ബെയ്ജിങ്: പ്രതികൂല കാലാവസ്ഥയിൽ ബുദ്ധിമുട്ടി ജോലിക്ക് വരുന്ന ജീവനക്കാർക്ക് പുത്തൻ ബിഎംഡബ്ല്യു കാറുകൾ സമ്മാനിച്ച് ചൈനയിലെ റെസ്റ്റോറന്റ് ഉടമ. മധ്യ ചൈനയിലെ ഹെനാൻ പ്രവിശ്യയിലുള്ള ജിയാവോസുവോയിൽ ബീഫ് ഹോട്ട്പോട്ട് റെസ്റ്റോറന്റ് ശൃംഖല നടത്തുന്ന മാ യാൻലിയാണ് മികച്ച പ്രകടനം കാഴ്ചവെച്ച തൊഴിലാളികൾക്ക് ഈ സർപ്രൈസ് സമ്മാനം നൽകിയതെന്ന് സൗത്ത് ചൈന മോർണിങ് പോസ്റ്റ് റിപ്പോർട്ട് ചെയ്യുന്നു. ഏകദേശം 3 ലക്ഷം യുവാൻ (ഏകദേശം 43 ലക്ഷം രൂപ) വിലമതിക്കുന്ന ഓരോ കാറിന്റെയും മുഴുവൻ തുകയും യാൻലി തന്നെയാണ് വഹിച്ചത്.
സെപ്റ്റംബർ 24-ന് ഔദ്യോഗിക മീറ്റിംഗിനെന്ന വ്യാജേന ജീവനക്കാരെ ബിഎംഡബ്ല്യു ഷോറൂമിൽ എത്തിച്ചാണ് ഈ അപ്രതീക്ഷിത സമ്മാനം കൈമാറിയത്. ഭൂരിഭാഗം പേരും ഇലക്ട്രിക് സ്കൂട്ടറുകളിൽ കനത്ത തണുപ്പും മഴയും കാറ്റും വകവെക്കാതെയാണ് ജോലിക്കെത്തിയിരുന്നതെന്നും, ഇത് അവരുടെ യാത്രയിൽ വലിയ ബുദ്ധിമുട്ടുണ്ടാക്കുന്നതായും ഉടമ മുൻപേ ശ്രദ്ധിച്ചിരുന്നു.
തണുത്തുറഞ്ഞ കാലാവസ്ഥയിൽ സ്കൂട്ടറോടിച്ച് എത്തിയ ഒരു ജീവനക്കാരന്റെ മുഖം ചുവന്നുതുടുത്തിരിക്കുന്നത് കണ്ടതാണ് ഈ തീരുമാനത്തിലേക്ക് നയിച്ചതെന്ന് മാ യാൻലി വ്യക്തമാക്കി. തനിക്ക് സുഖകരമായി യാത്ര ചെയ്യാൻ സൗകര്യമുള്ളപ്പോൾ ജീവനക്കാർ എന്തിന് യാത്രാക്ലേശം അനുഭവിക്കണമെന്ന ചിന്തയാണ് കാറുകൾ സമ്മാനിക്കാൻ പ്രേരിപ്പിച്ചതെന്നും, എന്നാൽ ഇത്തരമൊരു സമ്മാനം സ്വപ്നത്തിൽ പോലും കരുതിയിരുന്നില്ലെന്നും ജീവനക്കാർ പ്രതികരിച്ചു.
