മെക്സിക്കോയിലെ സിനലോവ സംസ്ഥാനത്തെ ജയിലിലുണ്ടായ രൂക്ഷമായ കലാപത്തിൽ ഒരു സന്ദർശകനും ഒൻപത് തടവുകാരും ഉൾപ്പെടെ 10 പേർ കൊല്ലപ്പെട്ടു. 16 തടവുകാർക്ക് പരിക്കേറ്റ സംഭവത്തിൽ അധികൃതർ ഇടപെട്ട് ജയിലിന്റെ നിയന്ത്രണം തിരിച്ചുപിടിച്ചതായും സംഘർഷത്തിന്റെ കാരണം പ്രോസിക്യൂട്ടർമാർ അന്വേഷിക്കുമെന്നും സംസ്ഥാന സുരക്ഷാ വിഭാഗം അറിയിച്ചു.
ഇതിന് തൊട്ടുമുമ്പ് അതിർത്തി സംസ്ഥാനമായ തമൗലിപാസിന്റെ തലസ്ഥാനമായ സിയുഡാഡ് വിക്ടോറിയയിലെ ജയിലിലും വലിയ തോതിലുള്ള വെടിവെപ്പ് അരങ്ങേറിയിരുന്നു. തടവുകാർ അനധികൃതമായി കൈക്കലാക്കിയ തോക്കുകൾ ഉപയോഗിച്ച് അധികൃതർക്ക് നേരെ വെടിയുതിർത്തതിനെത്തുടർന്ന് മൂന്ന് പോലീസ് ഉദ്യോഗസ്ഥരും നാല് തടവുകാരും കൊല്ലപ്പെടുകയും ആറ് പോലീസുകാർക്കും ഏഴ് തടവുകാർക്കും പരിക്കേൽക്കുകയും ചെയ്തു. ചൊവ്വാഴ്ച രാത്രി തുടങ്ങിയ ഓട്ടോമാറ്റിക് വെടിവെപ്പ് ബുധനാഴ്ച രാവിലെയോടെയാണ് സുരക്ഷാസേന നിയന്ത്രണവിധേയമാക്കിയത്.
തടവുകാരുടെ ആധിപത്യം, ജീവനക്കാരുടെ കുറവ്, അപര്യാപ്തമായ നിരീക്ഷണം, മോശം ആരോഗ്യ സൗകര്യങ്ങൾ, ജനത്തിരക്ക് എന്നിവ 2016-ൽ തന്നെ കണ്ടെത്തിയിരുന്നതായി സംഭവം അന്വേഷിക്കാൻ സംഘത്തെ അയച്ച മെക്സിക്കോ ദേശീയ മനുഷ്യാവകാശ കമ്മീഷൻ വ്യക്തമാക്കി. സിറ്റാസ് ഡ്രഗ് കാർട്ടലിന്റെ ആധിപത്യമുള്ള സിയുഡാഡ് വിക്ടോറിയ ജയിലിൽ കഴിഞ്ഞ മാർച്ചിലും മൂന്ന് പേർ കൊല്ലപ്പെടുകയും തുരങ്കം വഴി തടവുചാട്ടം നടക്കുകയും ചെയ്തിരുന്നു. രക്ഷപ്പെടുന്നതിനിടെ ഒരു തടവുകാരൻ വാഹനയാത്രക്കാരനെ വെടിവെച്ചുകൊന്നിരുന്നതായും പിന്നീട് ജയിലിനുള്ളിൽ ഒളിപ്പിച്ച രണ്ട് അസോൾട്ട് റൈഫിളുകൾ പോലീസ് കണ്ടെടുത്തതായും റിപ്പോർട്ടുണ്ട്.
