മധ്യ അമേരിക്കൻ രാജ്യമായ പാനമയിൽ രണ്ടര മണിക്കൂർ ഇടവേളയിൽ വൻ നാശനഷ്ടം വിതച്ച് ശക്തമായ ഇരട്ട ഭൂകമ്പം ഉണ്ടായി. റിക്ടർ സ്കെയിലിൽ 7.7, 6.6 തീവ്രത രേഖപ്പെടുത്തിയ ഭൂചലനങ്ങളിൽ നിരവധി കെട്ടിടങ്ങൾ തകർന്നു വീണതായും 46 ലക്ഷത്തോളം ആളുകളെ പ്രകൃതിക്ഷോഭം നേരിട്ട് ബാധിച്ചതായും വിവരമുണ്ട്.
പസഫിക് തീരദേശ പട്ടണങ്ങൾക്ക് സമീപമാണ് രണ്ട് ഭൂചലനങ്ങളുടെയും പ്രഭവകേന്ദ്രം രേഖപ്പെടുത്തിയത്. ഇതിൽ ആദ്യ ഭൂകമ്പത്തിന്റെ പ്രഭവകേന്ദ്രം പിറ്റലോസ അരിബ പട്ടണത്തിന് 10 കിലോമീറ്റർ അകലെയായിരുന്നു. പ്രകമ്പനത്തെ തുടർന്ന് പ്രഭവകേന്ദ്രത്തിൽ നിന്നും 200 കിലോമീറ്റർ അകലെയുള്ള തലസ്ഥാനമായ പാനമ സിറ്റിയിലെ ബഹുനില കെട്ടിടങ്ങളിൽനിന്ന് ആളുകളെ ഒഴിപ്പിച്ചു.
അറ്റ്ലാന്റിക്-പസഫിക് സമുദ്രങ്ങളെ ബന്ധിപ്പിക്കുന്ന നിർണ്ണായക ജലപാതയായ പാനമ കനാലിന്റെ ദൈനംദിന പ്രവർത്തനങ്ങൾക്ക് ഭൂകമ്പം മൂലം തടസ്സങ്ങൾ നേരിട്ടിട്ടില്ല. ദുരന്തബാധിത മേഖലകളിൽ രക്ഷാപ്രവർത്തനം പുരോഗമിക്കുകയാണെന്ന് പാനമ പ്രസിഡന്റ് ജോസ് റൗൾ മുലിനോ വ്യക്തമാക്കി.
