ഉയരക്കുറവ് മൂലമുള്ള അപകർഷതാബോധം മറികടക്കാൻ അൾട്രാമാരത്തൺ ഓട്ടക്കാരനായ ആരോൺ ട്രിൻ എന്ന യുവാവ് 1,50,000 ഡോളർ (ഏകദേശം 1.25 കോടി രൂപ) ചെലവഴിച്ച് കാലുകൾ നീട്ടുന്ന സങ്കീർണ്ണമായ ശസ്ത്രക്രിയയ്ക്ക് വിധേയനായി. 2025 മെയ് മാസത്തിൽ നടന്ന ഈ സർജറിക്ക് ശേഷം മൂന്ന് ഇഞ്ച് ഉയരം വർധിച്ചതോടെ പഴയ അപകർഷതാബോധം പൂർണ്ണമായും മാറിയതായി അഞ്ചടി ആറിഞ്ചുകാരനായിരുന്ന ട്രിൻ പീപ്പിൾ മാഗസിനോട് വെളിപ്പെടുത്തി.
അഞ്ചടി രണ്ടിഞ്ച് മാത്രം ഉയരമുള്ള പിതാവാണ് ട്രിന്നിന്റെ ശസ്ത്രക്രിയാ ചെലവുകൾ പൂർണ്ണമായും വഹിച്ചത്. ജീവിതത്തിലുടനീളം കുടുംബത്തിൽ നിന്നും സുഹൃത്തുക്കളിൽ നിന്നും ജോലിസ്ഥലത്തുനിന്നും നേരിടേണ്ടി വന്ന ഉയരവിവേചനവും അപമാനവുമാണ് മകന് ഇത്തരമൊരു സഹായം നൽകാൻ അദ്ദേഹത്തെ പ്രേരിപ്പിച്ചത്. ചെറുപ്പകാലത്ത് മകന്റെ ഉയരം കൂട്ടാൻ രാവിലെയുള്ള പാൽ കുടി ഉൾപ്പെടെയുള്ള കാര്യങ്ങൾ പിതാവ് ശ്രദ്ധിച്ചിരുന്നുവെങ്കിലും, യുവാവായപ്പോൾ ടിക്‌ടോക് വീഡിയോ വഴിയാണ് ഈ ശസ്ത്രക്രിയയെക്കുറിച്ച് ട്രിൻ അറിയുന്നത്.
തുടർന്ന് വെസ്റ്റ് പാം ബീച്ചിലെ പേലി ഓർത്തോപീഡിക് & സ്പൈൻ ഇൻസ്റ്റിറ്റ്യൂട്ടിലാണ് ശസ്ത്രക്രിയ നടത്തിയത്. ട്രിന്നിന്റെ മാതാവിൽ നിന്ന് ശസ്ത്രക്രിയയുടെ തലേദിവസം വരെ ഈ വിവരം ഇരുവരും രഹസ്യമാക്കി വെച്ചിരുന്നു. കാലിലെ അസ്ഥികൾ മുറിച്ച് ഉള്ളിൽ മെറ്റൽ ഉപകരണങ്ങൾ ഘടിപ്പിച്ച്, പുറത്തുനിന്നുള്ള കാന്തികശക്തി ഉപയോഗിച്ച് പ്രതിദിനം ഒരു മില്ലിമീറ്റർ വീതം അസ്ഥി നീട്ടുന്ന നാല് മാസത്തെ സങ്കീർണ്ണ പ്രക്രിയയ്ക്കും തുടർന്ന് വീണ്ടും നടക്കാൻ പഠിക്കുന്ന റിക്കവറി ഘട്ടങ്ങൾക്കും ശേഷമാണ് ഇയാൾ പുതിയ ഉയരം കൈവരിച്ചത്.
