പാരീസ്: വിദ്യാഭ്യാസ മേഖലയിലെ പ്രതിസന്ധികൾ പരിഹരിക്കണമെന്ന് ആവശ്യപ്പെട്ട് ഫ്രാൻസിൽ സ്കൂൾ വിദ്യാർത്ഥികൾ നടത്തുന്ന 'ജെൻ ആൽഫ' പ്രക്ഷോഭം കൂടുതൽ ശക്തമാകുന്നു. തലസ്ഥാനമായ പാരീസിൽ ഇന്ന് 40,000 വിദ്യാർത്ഥികൾ അണിനിരക്കുന്ന കൂറ്റൻ റാലിക്ക് പുറമെ ലിയോണും മാഴ്‌സെയും ഉൾപ്പെടെ പത്തോളം പ്രമുഖ നഗരങ്ങളിലും പ്രതിഷേധ മാർച്ചുകൾ നടക്കും. ക്ലാസ് മുറികളിലെ അമിത തിരക്ക്, അധ്യാപക ക്ഷാമം, മോശം അടിസ്ഥാന സൗകര്യങ്ങൾ എന്നിവ പരിഹരിക്കണമെന്ന് ചൂണ്ടിക്കാട്ടി സെപ്റ്റംബറിൽ പാരീസിൽ ആരംഭിച്ച സമരം അധ്യാപക സംഘടനകളുടെ പിന്തുണയോടെ രാജ്യവ്യാപകമായി പടരുകയായിരുന്നു.
കഴിഞ്ഞ ഒരാഴ്ചയ്ക്കിടെ നൂറുകണക്കിന് വിദ്യാലയങ്ങളാണ് സമരക്കാർ ഉപരോധിച്ചത്. പോലീസുമായുണ്ടായ സംഘർഷങ്ങളിൽ ഇതുവരെ 190 മുതൽ 200 ഓളം വിദ്യാർത്ഥികൾക്ക് പരിക്കേൽക്കുകയും അയ്യായിരത്തിലധികം പേർ കസ്റ്റഡിയിലാവുകയും ചെയ്തു; പിടിയിലായവരിൽ ഭൂരിഭാഗവും പ്രായപൂർത്തിയാകാത്ത കുട്ടികളാണ്.
പ്രതിഷേധക്കാർക്ക് നേരെ പോലീസ് നടത്തിയ ഗ്രനേഡ് പ്രയോഗത്തിൽ 15 വയസ്സുകാരന്റെ കൈപ്പത്തി തകരുകയും കഴിഞ്ഞയാഴ്ച കണ്ണീർവാതക ഗ്രനേഡ് പതിച്ച് മറ്റൊരു വിദ്യാർത്ഥിയുടെ തലയ്ക്ക് ഗുരുതരമായി പരിക്കേൽക്കുകയും ചെയ്തിട്ടുണ്ട്.
