തിരുവനന്തപുരം: സംസ്ഥാനത്തെ റോഡപകടങ്ങൾ കുറയ്ക്കുന്നതിനായി ഗതാഗത വകുപ്പ് ആവിഷ്കരിച്ച 'ജീവ-സുയാത്ര മിഷൻ' പദ്ധതിയുടെ ഉദ്ഘാടനം ഞായറാഴ്ച മുഖ്യമന്ത്രി നിർവഹിക്കും. 2030-ഓടെ റോഡപകട മരണങ്ങളും പരുക്കുകളും പകുതിയായി കുറയ്ക്കുകയെന്ന ലക്ഷ്യത്തോടെ നടപ്പിലാക്കുന്ന ഈ പദ്ധതിയുടെ ബ്രാൻഡ് അംബാസഡറായി നടൻ മമ്മൂട്ടി എത്തും.
അഞ്ച് അടിസ്ഥാന ലക്ഷ്യങ്ങളെ കേന്ദ്രീകരിച്ചാണ് മിഷന്റെ പ്രവർത്തനങ്ങൾ മുന്നോട്ട് പോകുന്നത്. റോഡുകളുടെ നിർമ്മാണത്തിലും അറ്റകുറ്റപ്പണികളിലും സുരക്ഷ ഉറപ്പാക്കുകയും ബ്ലാക്ക് സ്പോട്ടുകൾ പരിഹരിക്കുന്നതിന് അത്യാധുനിക എൻജിനീയറിങ് പരിഹാരങ്ങൾ നടപ്പിലാക്കുകയും ചെയ്യുന്ന 'സുരക്ഷിത നിരത്തുകൾ' ആണ് ഇതിൽ ആദ്യത്തേത്.
ഡ്രൈവർമാരിലും കാൽനടയാത്രക്കാരിലും ഗതാഗത നിയമങ്ങളെക്കുറിച്ച് അവബോധം വളർത്തുന്നതിനായി സ്കൂളുകളിലും കോളേജുകളിലും ബോധവത്കരണ പരിപാടികൾ സംഘടിപ്പിക്കുന്ന 'സുരക്ഷിത പെരുമാറ്റം', അമിതവേഗത നിയന്ത്രിക്കാൻ നൂതന സാങ്കേതികവിദ്യകളുടെ സഹായത്തോടെ കർശന നിയമപാലനം ഉറപ്പാക്കുന്ന 'സുരക്ഷിത വേഗത' എന്നിവയും പദ്ധതിയിലുണ്ട്.
ഇതിനുപുറമെ, വാഹനങ്ങളുടെ സുരക്ഷാ മാനദണ്ഡങ്ങളും കൃത്യമായ പരിശോധനകളും ഉറപ്പുവരുത്തുന്ന 'സുരക്ഷിത വാഹനങ്ങൾ', അപകടമുണ്ടായാൽ എത്രയും വേഗം വൈദ്യസഹായം ലഭ്യമാക്കുന്നതിനുള്ള രക്ഷാപ്രവർത്തന സംവിധാനങ്ങൾ ശക്തിപ്പെടുത്തുന്ന 'അപകടാനന്തര അടിയന്തര പ്രതികരണം' എന്നിവയും അഞ്ച് ലക്ഷ്യങ്ങളിൽ ഉൾപ്പെടുന്നു.
