പാലക്കാട്: കുപ്രസിദ്ധ ഗുണ്ടാത്തലവൻ ലോറൻസ് ബിഷ്‌ണോയിയുടെ സംഘവുമായി ബന്ധമുള്ള ഒറ്റപ്പാലം സ്വദേശി ഗുരുമൂര്‍ത്തി (27) പിടിയിലായി. തൃശൂർ സിറ്റി പൊലീസ് വീട്ടിൽ നിന്നാണ് ഇയാളെ കസ്റ്റഡിയിലെടുത്തത്; കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
നടൻ ടൈഗർ ഷ്റോഫിന് നേരെ വെടിയുതിർത്ത ഹരിയാനയിലെ ക്രിമിനൽ സംഘവുമായി ഗുരുമൂര്‍ത്തി ടെലഗ്രാം വഴി ആശയവിനിമയം നടത്തിയിരുന്നതായി അന്വേഷണത്തിൽ കണ്ടെത്തിയിട്ടുണ്ട്. ഞായറാഴ്ച വൈകിട്ട് മുംബൈ ജുഹുവിൽ ഫുട്ബോൾ കളി കഴിഞ്ഞ് കാറിൽ മടങ്ങുന്നതിനിടെയാണ് ടൈഗർ ഷ്റോഫിന് നേരെ മൂന്നംഗ സംഘം വെടിയുതിർത്തത്.
നടൻ സൽമാൻ ഖാനെ ലക്ഷ്യമിട്ടാണ് അക്രമികൾ മുംബൈയിലെത്തിയതെങ്കിലും കനത്ത സുരക്ഷയുള്ളതിനാൽ പദ്ധതി ഉപേക്ഷിക്കുകയായിരുന്നു. തുടർന്ന്, പൊലീസ് സുരക്ഷയില്ലാത്ത ടൈഗർ ഷ്റോഫിന്റെ യാത്രകൾ ശ്രദ്ധയിൽപ്പെട്ടതോടെ ലോറൻസ് ബിഷ്‌ണോയിയുടെ കൂട്ടാളിയായ അനിൽ പണ്ഡിറ്റിന്റെ നിർദേശപ്രകാരം അദ്ദേഹത്തെ ആക്രമിക്കാൻ തീരുമാനിക്കുകയായിരുന്നുവെന്ന് പൊലീസ് വ്യക്തമാക്കി.
വെടിവെപ്പ് കേസിൽ ഇതുവരെ എട്ടുപേരാണ് അറസ്റ്റിലായിട്ടുള്ളത്. നടന് നേരെ വെടിയുതിർത്ത ഹരിയാന സ്വദേശികളായ ഫൂൽ സിങ് (18), റഹാൻ (18), ബിഹാർ സ്വദേശി ഋത്വിക് എന്ന റോഷൻ (22) എന്നിവരെ കഴിഞ്ഞ ദിവസം രാജസ്ഥാനിൽ വെച്ച് പിടികൂടിയിരുന്നു.
ഇവർക്ക് പിന്നാലെ രണ്ട് സ്ത്രീകളടക്കം നാലുപേരെ ചൊവ്വാഴ്ച ഡൽഹി പൊലീസിന്റെ സ്‌പെഷ്യൽ സെൽ അറസ്റ്റ് ചെയ്ത് മുംബൈ പൊലീസിന് കൈമാറി. പിടിയിലായ കുനാൽ, സുമതി (സുമിത്) എന്നിവരാണ് തോക്കുകൾ സംഘടിപ്പിച്ചു നൽകിയതെന്നും, അറസ്റ്റിലായ രാധ, ബബിത എന്നീ സ്ത്രീകൾ ഇവ മുംബൈയിലെ ദാദറിലെത്തിച്ച് അക്രമികൾക്ക് കൈമാറുകയായിരുന്നുവെന്നും പൊലീസ് അറിയിച്ചു.
