കൊച്ചി: തന്നെ 'സാംസ്കാരിക നായിക എന്ന പൊല്ലാപ്പിൽ നിന്ന്' ഒഴിവാക്കണമെന്ന അഭ്യർത്ഥനയുമായി എഴുത്തുകാരി സാറാ ജോസഫ് രംഗത്തെത്തി. മാധ്യമ സുഹൃത്തുക്കളെങ്കിലും തന്നെ 'സാംസ്കാരിക നായിക' എന്ന തെറിവാക്ക് വിളിക്കരുതെന്ന് അഭ്യർത്ഥിക്കുന്നുവെന്നും താൻ ഒന്നിന്റെയും നായികയല്ലെന്നും അവർ സമൂഹമാധ്യമത്തിലൂടെ വ്യക്തമാക്കി.
താൻ ഒരു എഴുത്തുകാരി മാത്രമാണെന്നും ഏതൊരു സമൂഹജീവിയെയും പോലെ തനിക്ക് ശരിയെന്ന് തോന്നുന്ന കാര്യങ്ങൾ ഉറക്കെ പറഞ്ഞിട്ടുണ്ടെന്നും സാറാ ജോസഫ് കുറിച്ചു. കൂടാതെ, കൂട്ട ഒപ്പിടീക്കൽ പ്രസ്ഥാനക്കാർ കൊണ്ടുവരുന്ന പ്രസ്താവനകളിൽ ശരിയെന്ന് തോന്നുന്നതിൽ മാത്രമാണ് ഐക്യപ്പെട്ട് ഒപ്പിടാറുള്ളതെന്നും അവർ വ്യക്തമാക്കി.
