തിരുവനന്തപുരം: എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ, യു.ഡി.എഫ് കൺവീനർ അടൂർ പ്രകാശ്, വൈദ്യുതി മന്ത്രി സണ്ണി ജോസഫ് എന്നിവർക്കെതിരെ രൂക്ഷവിമർശനവുമായി രാജ്‌മോഹൻ ഉണ്ണിത്താൻ എം.പി രംഗത്തെത്തി. കേരളത്തിലെ കാര്യങ്ങളിൽ ഇടപെടാൻ കെ.സി. വേണുഗോപാലിന് സമയമില്ലെന്നും, അദ്ദേഹത്തിന്റെ കൂടെ നിൽക്കുന്ന സ്ഥാനമോഹികൾ വേണുഗോപാൽ പോലും അറിയാതെ നടത്തുന്ന പ്രസ്താവനകളാണ് അദ്ദേഹത്തെ വഷളാക്കുന്നതെന്നും രാജ്‌മോഹൻ ഉണ്ണിത്താൻ പറഞ്ഞു.
അടൂർ പ്രകാശ് യു.ഡി.എഫ് കൺവീനറാണോ അതോ എൽ.ഡി.എഫ് കൺവീനറാണോ എന്ന് സംശയമുണ്ടെന്നും, യു.ഡി.എഫിനെ ആക്രമിക്കുന്നത് എൽ.ഡി.എഫ് കൺവീനറുടെ ജോലിയാണെന്നും അദ്ദേഹം കുറ്റപ്പെടുത്തി. നിർജീവമായ പ്രതിപക്ഷത്തിന്റെ ആവനാഴിയിലേക്ക് ചില നേതാക്കൾ ആയുധവും ഔഷധവും നൽകുകയാണെന്നും പാർട്ടിക്ക് പുല്ലുവില കൽപ്പിച്ച് ചില കേന്ദ്രങ്ങളുടെ സമ്മർദ്ദത്തിന് വഴങ്ങുന്നവരുണ്ടെന്നും ഉണ്ണിത്താൻ ആരോപിച്ചു.
മന്ത്രി സണ്ണി ജോസഫിനെതിരെ ഒളിയമ്പെയ്ത എം.പി, യോഗ്യതയുള്ള പലരെയും ഒഴിവാക്കിയാണ് ഇവർക്ക് മന്ത്രിസ്ഥാനം നൽകിയതെന്നും ഇരിക്കുന്ന പദവിയുടെ മഹത്വം മനസ്സിലാക്കിയാണ് പ്രതികരിക്കേണ്ടതെന്നും ഓർമ്മിപ്പിച്ചു. എല്ലാ മന്ത്രിമാരെയും 'ഗൺ പോയിന്റിൽ' നിർത്താനുള്ള കാര്യങ്ങൾ തന്റെ കൈവശമുണ്ടെന്നും, ആറുമാസം കൊണ്ട് അത്ഭുതം സൃഷ്ടിക്കാൻ മുഖ്യമന്ത്രിയുടെ പക്കൽ അലാവുദ്ദീന്റെ അത്ഭുതവിളക്കില്ലെന്നും വ്യക്തമാക്കിയ അദ്ദേഹം, വിമർശിക്കുന്നവർ അതിന് യോഗ്യരാണോ എന്ന് ആത്മപരിശോധന നടത്തണമെന്നും കൂട്ടിച്ചേർത്തു.
റിപ്പോർട്ടർ ചാനലിനോടാണ് അദ്ദേഹത്തിന്റെ പ്രതികരണം.
