പത്തനംതിട്ട: 22.5 കോടി രൂപ ചെലവിൽ നിർമ്മാണം പൂർത്തിയാക്കിയ കോഴഞ്ചേരി പുതിയ പാലം നാളെ ഗതാഗതത്തിനായി തുറന്നുകൊടുക്കാനിരിക്കെ, പദ്ധതിയുടെ അവകാശവാദത്തെച്ചൊല്ലി അബിൻ വർക്കി എം.എൽ.എയും മുൻ മന്ത്രി വീണാ ജോർജും തമ്മിൽ ഫേസ്ബുക്കിൽ വാക്‌പോര് മുറുകുന്നു. പാലം പിണറായി സർക്കാരിന്റെ പദ്ധതിയാണെന്ന് വീണാ ജോർജ് അവകാശപ്പെടുമ്പോൾ, പദ്ധതിക്ക് അനുമതി നൽകിയത് ഉമ്മൻചാണ്ടി സർക്കാരാണെന്നാണ് അബിൻ വർക്കിയുടെ മറുപടി.

നാളെ പൊതുമരാമത്ത് മന്ത്രി പി.കെ. ബഷീർ പങ്കെടുക്കുന്ന ഉദ്ഘാടന ചടങ്ങിലേക്ക് മുൻ മന്ത്രി വീണാ ജോർജിനും ക്ഷണമുണ്ടെങ്കിലും അവർ ചടങ്ങിൽ നിന്ന് വിട്ടുനിൽക്കുമെന്നാണ് ലഭിക്കുന്ന വിവരം. മാർച്ചിൽ ഉദ്ഘാടനം നടത്തിയിട്ടും സൈക്കിൾ പോലും കടന്നുപോകാത്ത പാലമാണ് ഇപ്പോഴാണ് തുറന്നുകൊടുക്കുന്നതെന്നും, ചെറു നുണയ്ക്ക് ഊതിയാൽ തെറിക്കുന്ന മൂക്കോ കഴുത്തോ അല്ല തന്റേതെന്നും അബിൻ വർക്കി എം.എൽ.എ ഫേസ്ബുക്കിൽ കുറിച്ചു.

2014-ൽ ഉമ്മൻചാണ്ടി സർക്കാരിന്റെ കാലത്താണ് കോഴഞ്ചേരി പുതിയ പാലം നിർമ്മിക്കുന്നതിനുള്ള ബജറ്റ് പ്രഖ്യാപനമുണ്ടായത്; തുടർന്ന് 2018-ൽ ഒന്നാം പിണറായി സർക്കാരിന്റെ കിഫ്ബി പദ്ധതിയിൽ ഉൾപ്പെടുത്തിയാണ് പാലത്തിന്റെ നിർമ്മാണ പ്രവർത്തനങ്ങൾ ആരംഭിച്ചത്.