തിരുവനന്തപുരം: പാങ്ങപ്പാറയിൽ അഭിറാം എന്ന യുവാവ് കൊല്ലപ്പെട്ട കേസിൽ പിടിയിലായ പതിനേഴുകാരനായ ഒന്നാം പ്രതിയുടെ കുറ്റസമ്മത മൊഴി പുറത്തുവന്നു. അഭിറാമിനോടും സുഹൃത്തിനോടുമുള്ള മുൻവൈരാഗ്യമാണ് കൊലപാതകത്തിന് കാരണമെന്നും, തന്റെ മുൻകാമുകി സുഹൃത്തുമായി അടുത്തതാണ് ശത്രുതയ്ക്ക് വഴിവെച്ചതെന്നും പ്രതി പോലീസിനോട് വ്യക്തമാക്കി. അഭിറാമിനെ ആളൊഴിഞ്ഞ സ്ഥലത്തേക്ക് താനാണ് കൂട്ടിക്കൊണ്ടുപോയതെന്നും രണ്ടാം പ്രതിയായ ഉമർ പിന്നീടാണ് എത്തിയതെന്നും ഇയാൾ വെളിപ്പെടുത്തി.
കൊലപാതകത്തിന്റെ മുഖ്യ സൂത്രധാരൻ ഇരുപത്തിരണ്ടുകാരനായ ഉമറാണെന്ന് ഇയാളുടെ പെൺസുഹൃത്ത് ഐശ്വര്യ പോലീസിന് മൊഴി നൽകി. കുറ്റകൃത്യത്തിന് ശേഷം അഭിറാമിന്റെ മൃതദേഹം മറ്റെവിടെയെങ്കിലും ഒളിപ്പിക്കാനായിരുന്നു പ്രതികളുടെ പദ്ധതിയെങ്കിലും, ചാക്കിലാക്കുന്നതിനിടെ കനത്ത മഴ പെയ്തതോടെ പദ്ധതി ഉപേക്ഷിച്ച് മൃതദേഹം കുറ്റിക്കാട്ടിൽ ഉപേക്ഷിച്ച് കടന്നുകളയുകയായിരുന്നുവെന്ന് ഐശ്വര്യയുടെ മൊഴിയിലൂടെ വ്യക്തമായി.
മോഷണക്കേസുകളിൽ മുൻപ് പ്രതിയായിട്ടുള്ള ഉമറിന്റെ സഹായിയായിരുന്നു ഒന്നാം പ്രതിയായ പതിനേഴുകാരനെന്ന് പോലീസ് അറിയിച്ചു. പതിനെട്ട് വയസ്സിന് താഴെയുള്ള കുട്ടികളെ മറയാക്കി മോഷണങ്ങൾ നടത്തിയിരുന്ന ഉമറാണ് അഭിറാമിനെ വധിക്കാനുള്ള ഗൂഢാലോചനയിൽ പ്രധാന പങ്കുവഹിച്ചതെന്നും അന്വേഷണസംഘം കണ്ടെത്തിയിട്ടുണ്ട്.
