കൊച്ചി: കാലടി സംസ്കൃത സർവകലാശാലയിൽ വിദ്യാർത്ഥികളെ സസ്പെൻഡ് ചെയ്ത നടപടിയിൽ വൈസ് ചാൻസലർക്കെതിരെ രൂക്ഷവിമർശനവുമായി ഹൈക്കോടതി സിംഗിൾ ബെഞ്ച്. വിദ്യാർത്ഥികൾ നടപടി നേരിട്ട് 60 ദിവസം പിന്നിട്ടുവെന്നും അവർക്ക് പരീക്ഷ എഴുതാൻ സാധിച്ചില്ലെന്നും ചൂണ്ടിക്കാട്ടിയ കോടതി, 'ഇനിയും അരിശം തീർന്നില്ലേ' എന്ന കുഞ്ചൻ നമ്പ്യാരുടെ കവിതാശകലം ഉദ്ധരിച്ചാണ് വിസിയോട് ചോദ്യങ്ങൾ ഉന്നയിച്ചത്. സസ്പെൻഷൻ പിൻവലിക്കണമെന്ന് വാക്കാൽ പരാമർശിച്ച കോടതി, കേസിൽ വിശദമായ വാദം മറ്റന്നാൾ കേൾക്കുമെന്നും വ്യക്തമാക്കി.
വിദ്യാർത്ഥികൾ ചെയ്ത തെറ്റുകളെ ന്യായീകരിക്കുന്നില്ലെങ്കിലും 60 ദിവസം പുറത്തുനിർത്തിയുള്ള നടപടി മതിയാകില്ലേ എന്ന് കോടതി ആരാഞ്ഞു; ഇവിടുത്തെ രാഷ്ട്രീയക്കാർ വിദ്യാർത്ഥി കാലഘട്ടത്തിൽ എന്തൊക്കെ ചെയ്തിരുന്നുവെന്നും കോടതി ഓർമ്മിപ്പിച്ചു. ആദ്യ പരാതി നൽകി മൂന്ന് ദിവസത്തിന് ശേഷമെടുത്ത രണ്ടാമത്തെ എഫ്ഐആർ നിലനിൽക്കുമോയെന്നും കോടതി സംശയം പ്രകടിപ്പിച്ചു. ഹർജി വേഗത്തിൽ തീർപ്പാക്കാൻ സുപ്രീം കോടതിയുടെ നിർദ്ദേശമുണ്ടെന്ന് വ്യക്തമാക്കിയ സിംഗിൾ ബെഞ്ചിന്റെ നിരീക്ഷണങ്ങൾ സസ്പെൻഷനിലായ വിദ്യാർത്ഥികൾക്ക് അനുകൂലമായ സൂചനയാണ് നൽകുന്നത്.
നേരത്തെ സമർപ്പിച്ച റിട്ട് ഹർജി ഭേദഗതി ചെയ്താണ് വിദ്യാർത്ഥികൾ പുതിയ അപേക്ഷ നൽകിയത്. തങ്ങൾക്ക് 60 ശതമാനം ഹാജരുണ്ടെന്നും പരീക്ഷ എഴുതാൻ അർഹതയുണ്ടെന്നും വിദ്യാർത്ഥികൾ ഹർജിയിൽ ബോധിപ്പിച്ചു; ശേഷിക്കുന്ന 20 ശതമാനം ഹാജർ ഇളവ് നൽകാൻ വിസിക്ക് അധികാരമുണ്ടെങ്കിലും ക്യാമ്പസ് വിലക്ക് മൂലം മാപ്പപേക്ഷ സമർപ്പിക്കാൻ സാധിച്ചില്ലെന്നും അവർ വ്യക്തമാക്കി. വിസിയെ ശാരീരികമായി ആക്രമിച്ചെന്നും പ്രതീകാത്മക ശവസംസ്കാരം നടത്തിയെന്നും കാണിച്ച് രജിസ്റ്റർ ചെയ്തത് വ്യാജ കേസുകളാണെന്നും വിദ്യാർത്ഥികൾ ഹർജിയിൽ ചൂണ്ടിക്കാട്ടിയിട്ടുണ്ട്.
