സംസ്ഥാനത്തെ സർവകലാശാലകളിൽ യുഡിഎഫ് സർക്കാർ സ്വകാര്യവൽക്കരണ നീക്കങ്ങളാണ് നടത്തുന്നതെന്നും, ഇത് പണമുള്ളവർക്ക് മാത്രം ഉന്നതവിദ്യാഭ്യാസം സാധ്യമാകുന്ന അവസ്ഥയുണ്ടാക്കുമെന്നും സിപിഐഎം സംസ്ഥാന സെക്രട്ടറി എം.വി. ഗോവിന്ദൻ ആരോപിച്ചു. എൽഡിഎഫ് ഭരണകാലത്ത് സാമൂഹ്യനീതി മുൻനിർത്തിയാണ് തീരുമാനങ്ങൾ എടുത്തതെങ്കിൽ, നിലവിൽ കോഴ്സുകൾക്ക് എൻഒസി (NOC) പോലും ആവശ്യമില്ലെന്ന വികലമായ നിലപാടിലാണ് സർക്കാരെന്ന് അദ്ദേഹം കുറ്റപ്പെടുത്തി.
പിഎസ്‌സിയുടെ വിശ്വാസ്യത തകർക്കാൻ ചില മാധ്യമങ്ങൾ ആസൂത്രിതമായി നടത്തുന്ന പ്രചാരണങ്ങൾക്ക് സർക്കാർ കൂട്ടുനിൽക്കുകയാണെന്ന് അദ്ദേഹം ചൂണ്ടിക്കാട്ടി. മികച്ച രീതിയിൽ പ്രവർത്തിച്ച പിഎസ്‌സി ചെയർമാനെ കേസിൽ കുടുക്കി ഭയപ്പെടുത്താമെന്ന് ആരും കരുതേണ്ടതില്ലെന്നും, പ്രതികരിക്കേണ്ട നിർണായക ഘട്ടത്തിൽ അദ്ദേഹം സംസാരിക്കുമെന്നും എം.വി. ഗോവിന്ദൻ വ്യക്തമാക്കി.
ഹൈക്കോടതിയുടെ പരിഗണനയിലുള്ള കേസ് ആയതിനാലാണ് പിഎസ്‌സി ചെയർമാൻ നിലവിൽ ചോദ്യം ചെയ്യലിന് ഹാജരാകാത്തതെന്നാണ് കരുതുന്നതെന്നും അദ്ദേഹം കൂട്ടിച്ചേർത്തു.
