ആലപ്പുഴ: എസ്ഡിപിഐ സംസ്ഥാന സെക്രട്ടറി കെ.എസ്. ഷാൻ കൊല്ലപ്പെട്ട കേസിലെ വിചാരണ നടപടികൾ നവംബർ 20-ലേക്ക് മാറ്റിവെച്ചു. വിചാരണ നീട്ടിനൽകണമെന്ന് ആവശ്യപ്പെട്ട് പ്രതിഭാഗം അഡ്ജേൺമെന്റ് ഹർജി നൽകുകയായിരുന്നു. മഹാരാജാസ് കോളേജിലെ അഭിമന്യു വധക്കേസുമായി ബന്ധപ്പെട്ട് അഭിഭാഷകന് ഹൈക്കോടതിയിൽ ഹാജരാകേണ്ടതുണ്ടെന്ന വിവരം കോടതിയെ അറിയിച്ചതിനെ തുടർന്നാണ് തീരുമാനം.
2021 ഡിസംബർ 18-നാണ് ആലപ്പുഴ മണ്ണഞ്ചേരിയിൽ വെച്ച് കെ.എസ്. ഷാൻ ആക്രമണത്തിൽ കൊല്ലപ്പെടുന്നത്. കേസിൽ ഉൾപ്പെട്ട ആർഎസ്എസ് പ്രവർത്തകരായ പ്രതികൾക്ക് 2025 സെപ്റ്റംബറിൽ സുപ്രീം കോടതി ജാമ്യം അനുവദിച്ചിരുന്നു.
നേരിട്ട് പങ്കാളിത്തമുണ്ടെന്ന് ചൂണ്ടിക്കാട്ടി ഹൈക്കോടതി നേരത്തെ ജാമ്യം നിഷേധിച്ചിരുന്ന അഭിമന്യു, അതുൽ, സനന്ദ് അടക്കമുള്ള പ്രതികൾക്കാണ് പരമോന്നത കോടതി ജാമ്യം നൽകിയത്. പ്രതികൾക്ക് ജാമ്യം അനുവദിക്കരുതെന്ന് ആവശ്യപ്പെട്ട് സംസ്ഥാന സർക്കാർ സത്യവാങ്മൂലം സമർപ്പിച്ചിരുന്നെങ്കിലും കോടതി അത് തള്ളിയാണ് ഇളവ് നൽകിയത്.
