മലപ്പുറം: സംസ്ഥാനത്ത് വീണ്ടും ഷിഗെല്ല ബാധ സ്ഥിരീകരിച്ച സാഹചര്യത്തിൽ മലപ്പുറം, കോഴിക്കോട് ജില്ലകളിൽ ആരോഗ്യവകുപ്പ് ജാഗ്രതാ മുന്നറിയിപ്പ് നൽകി. നിലവിൽ ഇരു ജില്ലകളിലുമായി അഞ്ച് പേർക്കാണ് രോഗം റിപ്പോർട്ട് ചെയ്തത്. രോഗബാധിതരുടെ എണ്ണം കൂടുന്ന പശ്ചാത്തലത്തിൽ പ്രതിരോധ പ്രവർത്തനങ്ങളും ആരോഗ്യവകുപ്പ് ശക്തമാക്കിയിട്ടുണ്ട്.
മലപ്പുറം അമരമ്പലത്തെ കടയിൽനിന്ന് ലഘുഭക്ഷണം കഴിച്ച നാല് വയസ്സുള്ള പെൺകുട്ടിക്കും പാലുണ്ടയിലെ കടയിൽനിന്ന് മന്തി കഴിച്ച മറ്റ് രണ്ട് പേർക്കുമാണ് ജില്ലയിൽ രോഗം കണ്ടെത്തിയത്. കൂടാതെ പ്രദേശത്ത് വയറിളക്കം, ഛർദ്ദി, വയറുവേദന തുടങ്ങിയ അസ്വസ്ഥതകളോടെ 23-ഓളം പേർ നിരീക്ഷണത്തിലാണ്; ലക്ഷണങ്ങളോടെ ആശുപത്രിയിൽ പ്രവേശിപ്പിക്കപ്പെട്ട ചിലരുടെ പരിശോധനാഫലം കൂടി വരാനുണ്ട്. ഇതിന്റെ ഭാഗമായി രോഗം സ്ഥിരീകരിച്ചവരുടെ വീടുകളിൽ ആരോഗ്യ പ്രവർത്തകർ ക്ലോറിനേഷൻ പൂർത്തിയാക്കി.
കോഴിക്കോട് മേപ്പയിൽ സീനിയർ ബേസിക് സ്കൂളിലെ രണ്ട് വിദ്യാർത്ഥികൾക്കാണ് പുതുതായി രോഗം സ്ഥിരീകരിച്ചത്. ഉച്ചഭക്ഷണത്തിനൊപ്പം മുട്ടക്കറിയും തൈരും കഴിച്ച കുട്ടികളിൽ ഛർദ്ദിയും പനിയും വയറിളക്കവും അനുഭവപ്പെട്ടതിനെ തുടർന്നാണ് ആശുപത്രിയിൽ പ്രവേശിപ്പിച്ചത്. നേരത്തെയും ഇതേ സ്കൂളിൽ പഠിക്കുന്ന ഒരു കുട്ടിക്ക് ഷിഗെല്ല ബാധിച്ചിരുന്നു.
