കൊച്ചി: കാലടി സംസ്കൃത സർവകലാശാലയിൽ എസ്എഫ്ഐ പ്രവർത്തകർ നടത്തുന്ന അനിശ്ചിതകാല നിരാഹാര സമരത്തിന് പിന്തുണയുമായി നടൻ പ്രകാശ് രാജ് സമരപ്പന്തലിലെത്തി. അന്യായമായി ഏർപ്പെടുത്തിയ സസ്‌പെൻഷൻ പിൻവലിക്കുക, പരീക്ഷ എഴുതാൻ അനുമതി നൽകുക എന്നീ ആവശ്യങ്ങൾ ഉന്നയിച്ചാണ് വിദ്യാർത്ഥി സംഘടന നിരാഹാര സമരം തുടരുന്നത്. ഡിവൈഎഫ്ഐ സംസ്ഥാന പ്രസിഡന്റ് ചിന്താ ജെറോ ഉൾപ്പെടെയുള്ള നേതാക്കൾക്കൊപ്പമാണ് അദ്ദേഹം എത്തിയത്.
സസ്പെൻഷന് മുൻപ് നൂറ് ശതമാനം ഹാജരുണ്ടായിരുന്ന വിദ്യാർത്ഥികൾക്ക് പോലും പരീക്ഷ എഴുതാൻ അവസരം നൽകുന്നില്ലെന്ന വിഷയം ഡിവൈഎഫ്ഐ നേതാക്കൾ പ്രകാശ് രാജിന്റെ ശ്രദ്ധയിൽപ്പെടുത്തി. തുടർന്ന് മാധ്യമങ്ങളോട് സംസാരിച്ച അദ്ദേഹം, വിദ്യാർത്ഥികൾ ചോദിക്കുന്നത് അവകാശങ്ങളാണെന്നും ചോദ്യങ്ങൾ ഉന്നയിക്കുന്നതിന് അവർ ആരോടും മാപ്പ് പറയേണ്ടതില്ലെന്നും വ്യക്തമാക്കി.
കലയെയും വിദ്യാർത്ഥികളുടെ പ്രതിഷേധങ്ങളെയും തിരിച്ചറിയാനുള്ള വിവേകമോ സംവേദനക്ഷമതയോ വൈസ് ചാൻസലർക്കില്ലെന്ന് അദ്ദേഹം കുറ്റപ്പെടുത്തി. ബ്രിട്ടീഷുകാർക്ക് മാപ്പപേക്ഷ എഴുതിക്കൊടുത്തവരാണ് ഇന്നത്തെ ഭരണാധികാരികൾ; എന്നാൽ ഭഗത് സിംഗ്, മഹാത്മാ ഗാന്ധി, ബി.ആർ. അംബേദ്കർ എന്നിവരുടെ പാരമ്പര്യമുള്ള വിദ്യാർത്ഥികൾ ആരോടും മാപ്പ് പറയില്ലെന്നും അദ്ദേഹം കൂട്ടിച്ചേർത്തു.
