കൊച്ചി: കാക്കനാട് സ്വകാര്യ ബസ് തട്ടി കൊല്ലപ്പെട്ട അക്ഷരയുടെ കുടുംബം കടുത്ത വേദനയ്ക്കിടയിലും റോഡുകളിലെ നിയമലംഘനങ്ങൾക്കെതിരെ രംഗത്ത്. റോഡിലെ നിയമലംഘനങ്ങൾ ഇനിയെങ്കിലും പൂർണ്ണമായി അവസാനിക്കണമെന്നും ട്രാഫിക് ചട്ടങ്ങൾ കൃത്യമായി പാലിക്കാൻ ബസ് ഉടമകൾ തയ്യാറാകണമെന്നും അക്ഷരയുടെ പിതാവ് ഓമനക്കുട്ടൻ ആവശ്യപ്പെട്ടു. വിഷയത്തിൽ ഹൈക്കോടതി നടത്തിയ ഇടപെടലുകൾ ആശ്വാസകരമാണെന്നും അദ്ദേഹം വ്യക്തമാക്കി.
അപകടസമയത്ത് ബസ് അമിതവേഗതയിലായിരുന്നുവെന്നും ഇടുങ്ങിയ വീഥികളിൽ അതീവ ജാഗ്രതയോടെ വാഹനം ഓടിക്കാനും സ്പീഡ് ബ്രേക്കറുകൾ കൃത്യമായി ഉപയോഗിക്കാനും ഡ്രൈവർമാർ ശ്രദ്ധിക്കണമെന്നും അദ്ദേഹം ചൂണ്ടിക്കാട്ടി. അക്ഷര റോഡിന്റെ ഒരു വശത്തേക്ക് പരമാവധി ഒതുങ്ങിയാണ് പോയിരുന്നതെന്ന് സംഭവത്തിന്റെ ദൃശ്യങ്ങൾ വ്യക്തമാക്കുന്നുണ്ടെന്നും, അമിതവേഗതയിലെത്തിയ ബസിന് മുന്നിൽ മകൾ തീർത്തും നിസ്സഹായയായിരുന്നുവെന്നും അദ്ദേഹം മാധ്യമങ്ങളോട് പറഞ്ഞു.
തങ്ങളുടെ മകൾക്ക് സംഭവിച്ച ദുരന്തം മറ്റാർക്കും ആവർത്തിക്കരുതെന്നും, ബസ് ജീവനക്കാരുടെ ഭാഗത്തുനിന്നുണ്ടായ കടുത്ത അശ്രദ്ധയാണ് യുവതിയുടെ ജീവൻ നഷ്ടപ്പെടാൻ കാരണമായതെന്നും ബന്ധുക്കളും പ്രതികരിച്ചു.
