കൊച്ചി: കൊച്ചിയിൽ യുവ ഡോക്ടറെ മർദിച്ച കേസിൽ യുവ നടിയുൾപ്പെടെ മൂന്ന് പ്രതികൾ സമർപ്പിച്ച ജാമ്യാപേക്ഷ എറണാകുളം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി തള്ളി. പ്രതികളെ കൂടുതൽ ചോദ്യം ചെയ്യാനും കസ്റ്റഡിയിൽ വാങ്ങാനും ഉണ്ടെന്ന പോലീസിന്റെ വാദവും, ജാമ്യം അനുവദിക്കുന്നത് അന്വേഷണത്തെ ബാധിക്കുമെന്ന പ്രോസിക്യൂഷൻ നിലപാടും കണക്കിലെടുത്താണ് കോടതി നടപടി.
തങ്ങൾക്കെതിരെയുള്ള കേസ് കെട്ടിച്ചമച്ചതാണെന്നും ഡോക്ടറാണ് ഇതിന്റെ മുഖ്യ സൂത്രധാരനെന്നുമായിരുന്നു ജാമ്യാപേക്ഷയിൽ പ്രതികൾ കോടതിയെ അറിയിച്ചിരുന്നത്. എന്നാൽ ഈ വാദങ്ങളെ പ്രോസിക്യൂഷനും പോലീസും ശക്തമായി എതിർത്തു. ഇന്നലെയാണ് പ്രതികൾ ജാമ്യം തേടി മജിസ്ട്രേറ്റ് കോടതിയെ സമീപിച്ചത്.
സംഭവവുമായി ബന്ധപ്പെട്ട് എട്ടോളം പേർ കൂടി പിടിയിലാകാനുണ്ടെന്ന് പോലീസ് വ്യക്തമാക്കി. ഒളിവിലുള്ള പ്രതികൾക്കായി അന്വേഷണം ഊർജിതമാക്കിയിരിക്കുകയാണ്.
