ന്യൂഡൽഹി: യുഎസ് പ്രസിഡന്റ് തിരഞ്ഞെടുപ്പിലെ പരാജയം ഡൊണാൾഡ് ട്രംപിനും തീവ്ര വലതുപക്ഷ രാഷ്ട്രീയത്തിനും കനത്ത തിരിച്ചടിയാണെന്ന് സിപിഐഎം ജനറൽ സെക്രട്ടറി എം.എ. ബേബി. ഇടതുപക്ഷ പ്രസ്ഥാനങ്ങളുടെ പ്രസക്തി നഷ്ടപ്പെട്ടുവെന്ന വാദങ്ങൾ തെറ്റാണെന്ന് തെളിയിക്കുന്നതാണ് ഈ ജനവിധിയെന്നും, ട്രംപിനെ ജയിപ്പിച്ചുവിടാൻ യുഎസിൽ ഒരു ഗ്യാനേഷ് കുമാർ ഇല്ലാത്തതുകൊണ്ടാണ് അവിടെ തോൽവി സംഭവിച്ചതെന്നും അദ്ദേഹം ചൂണ്ടിക്കാട്ടി. ഈ രാഷ്ട്രീയമാറ്റം ഇന്ത്യയിലും പ്രതിഫലിക്കുമെന്നും പ്രതിപക്ഷത്തിന്റെ നിരന്തരമായ ഇടപെടലുകൾ കാരണമാണ് ബിജെപി നിലത്തുറച്ചു ചിന്തിക്കാൻ തുടങ്ങിയതെന്നും അദ്ദേഹം പറഞ്ഞു.
ഇന്ത്യ സഖ്യത്തിന്റെ നേതൃത്വത്തിൽ പാർലമെന്റ് സമ്മേളനത്തിലടക്കം അടുത്തഘട്ട സമരപരിപാടികൾ ആലോചിച്ചുവരികയാണെന്ന് അദ്ദേഹം വ്യക്തമാക്കി. പ്രതിപക്ഷ പ്രതിഷേധങ്ങൾക്കൊപ്പം തന്നെ സിപിഐഎമ്മിന്റെ പാർട്ടി പഠന ക്ലാസുകളും സംഘടിപ്പിക്കും. നേതാക്കളോ പ്രവർത്തകരോ സർവജ്ഞരല്ലെന്നും ജനങ്ങളിൽ നിന്ന് തെറ്റുകൾ മനസ്സിലാക്കി തിരുത്തി മുന്നോട്ടുപോകാൻ കമ്മ്യൂണിസ്റ്റുകാർ തയ്യാറാകണമെന്നും എം.എ. ബേബി ഓർമ്മിപ്പിച്ചു. നേതാക്കളുടെ പാർലമെന്ററി വ്യാമോഹം ഒരുതരത്തിലും അംഗീകരിക്കാനാകില്ല.
പാർട്ടി കേന്ദ്ര കമ്മിറ്റിയുടെ പഠന ക്ലാസുകൾ പൂർത്തിയായതായും തുടർചർച്ചകൾ ഇനി സംസ്ഥാന തലങ്ങളിൽ നടക്കുമെന്നും അദ്ദേഹം അറിയിച്ചു. പ്രത്യേക കാരണങ്ങളാലാണ് മുഖ്യമന്ത്രി പിണറായി വിജയന് പഠന ക്ലാസിൽ പങ്കെടുക്കാതിരിക്കാൻ ഇളവ് നൽകിയതെന്നും പാർട്ടി പ്രവർത്തനങ്ങളിൽ എന്തെങ്കിലും തരത്തിലുള്ള പോരായ്മകൾ സംഭവിച്ചിട്ടുണ്ടെങ്കിൽ അത് തിരുത്തി ജനങ്ങളെ ചേർത്തുപിടിച്ച് പാർട്ടി മുന്നോട്ടുപോകുമെന്നും എം.എ. ബേബി ഡൽഹിയിൽ കൂട്ടിച്ചേർത്തു.
