കൊച്ചി: റെയിൽവേ പാളം മുറിച്ചുകടക്കുന്നതിനിടെ ട്രെയിൻ തട്ടിയുണ്ടാകുന്ന അപകടങ്ങൾക്ക് നഷ്ടപരിഹാരം അനുവദിക്കാൻ സാധിക്കില്ലെന്ന് എറണാകുളം റെയിൽവേ ക്ലെയിംസ് ട്രൈബ്യൂണൽ വ്യക്തമാക്കി. ട്രാക്ക് മുറിച്ചുകടക്കുന്നത് നിയമപ്രകാരം ക്രിമിനൽ കുറ്റമായതിനാലും സ്വന്തം അശ്രദ്ധ മൂലമുണ്ടാകുന്ന നിയമലംഘനമായതിനാലും ഇത്തരം സംഭവങ്ങളിൽ ആനുകൂല്യം നൽകാനാവില്ലെന്ന് ചൂണ്ടിക്കാട്ടിയാണ് ട്രൈബ്യൂണലിന്റെ ഉത്തരവ്. മാവേലിക്കര റെയിൽവേ സ്റ്റേഷനിൽ ട്രാക്ക് മറികടക്കുന്നതിനിടെ അപകടത്തിൽപ്പെട്ട ചങ്ങനാശ്ശേരി സ്വദേശി തോമസ് ജോൺ സമർപ്പിച്ച നഷ്ടപരിഹാര അപേക്ഷ തള്ളിക്കൊണ്ടാണ് ഈ നിർണ്ണായക വിധി.

കൊല്ലം-എറണാകുളം മെമു ട്രെയിനിൽ സഞ്ചരിക്കവെ വീണ് പരിക്കേറ്റതാണെന്ന് വാദിച്ച തോമസ്, കോട്ടയം മെഡിക്കൽ കോളേജ് ആശുപത്രിയിൽ ദീർഘനാൾ ചികിത്സയിലായിരുന്നുവെന്നും 10 ലക്ഷം രൂപ നഷ്ടപരിഹാരം വേണമെന്നും ആവശ്യപ്പെട്ടാണ് ട്രൈബ്യൂണലിനെ സമീപിച്ചത്. എന്നാൽ തെളിവുകൾ നിരത്തി റെയിൽവേ ഈ വാദങ്ങളെ എതിർത്തു.

പ്ലാറ്റ്‌ഫോമുകളിലേക്ക് പ്രവേശിക്കാൻ ഫുട്ട് ഓവർ ബ്രിഡ്ജ് നിലവിലുണ്ടായിട്ടും അത് ഉപയോഗിക്കാതെ പാളത്തിലൂടെ നടക്കുന്നത് ബോധപൂർവ്വം അപകടം ക്ഷണിച്ചുവരുത്തുന്നതിന് തുല്യമാണെന്ന് റെയിൽവേ വാദിച്ചു. യാത്രയ്ക്കിടെ സ്വാഭാവികമായി ഉണ്ടാകുന്ന അപകടങ്ങളിലെ ഇരകൾക്ക് മാത്രമേ നഷ്ടപരിഹാരത്തിന് അർഹതയുള്ളൂ എന്ന റെയിൽവേയുടെ നിലപാട് ശരിവെച്ചാണ് ട്രൈബ്യൂണൽ ഹർജി തീർപ്പാക്കിയത്.