കൊല്ലം: ശബരിമലയിലെ മിൽമ നെയ്യ് തട്ടിപ്പ് കേസിൽ പ്രതികളായ ദേവസ്വം ജീവനക്കാരൻ ജയലാൽ, ട്രാൻസ്പോർട്ട് കരാറുകാരൻ എസ്.എസ്. ബിനു എന്നിവരെ മൂന്ന് ദിവസത്തേക്ക് വിജിലൻസ് കോടതി കസ്റ്റഡിയിൽ വിട്ടു. കേസിലെ നാലും അഞ്ചും പ്രതികളായ ഇവരെ ഒന്നിച്ചിരുത്തി വിശദമായി ചോദ്യം ചെയ്യുന്നതിനൊപ്പം സാമ്പത്തിക ഇടപാടുകളും സംഘം പരിശോധിക്കും.
കഴിഞ്ഞ മണ്ഡല-മകരവിളക്ക് തീർത്ഥാടന കാലത്ത് സന്നിധാനത്തേക്ക് കൊണ്ടുവരേണ്ടിയിരുന്ന മിൽമ നെയ്യ് തമിഴ്നാട്ടിലെ രണ്ട് ഏജൻസികൾക്ക് മറിച്ചുവിറ്റ് പകരം ഗുണനിലവാരം കുറഞ്ഞ മോശം നെയ്യ് വിതരണം ചെയ്തെന്നാണ് കരാറുകാരൻ എസ്.എസ്. ബിനുവിനെതിരെയുള്ള കണ്ടെത്തൽ. ഇത്തരത്തിൽ വ്യാജ നെയ്യ് എത്തിച്ച് ക്രമക്കേട് നടത്തിയതിലൂടെ കരാറുകാരൻ ലക്ഷങ്ങൾ സമ്പാദിച്ചതായും തിരുവിതാംകൂർ ദേവസ്വം ബോർഡിന് കനത്ത സാമ്പത്തിക നഷ്ടം ഉണ്ടായതായും വിജിലൻസ് വ്യക്തമാക്കി.
നെയ്യ് സ്റ്റോർ സൂപ്രണ്ടിന്റെ ഓഫീസിലെ ജീവനക്കാരനും ദേവസ്വം ബോർഡിലെ പഞ്ചവാദ്യം വിഭാഗം ഉദ്യോഗസ്ഥനുമായ ജയലാൽ, മിൽമ നെയ്യ് സന്നിധാനത്ത് സുരക്ഷിതമായി എത്തിയെന്ന് തെറ്റായ രേഖകൾ ചമയ്ക്കാനും അതുവഴി പണം കൈപ്പറ്റാനും കൂട്ടുനിന്നതായി വിജിലൻസ് അന്വേഷണത്തിൽ കണ്ടെത്തിയിട്ടുണ്ട്.
