തിരുവനന്തപുരം: പാങ്ങപ്പാറയിൽ അഭിറാം കൊല്ലപ്പെട്ട കേസിൽ മുഖ്യപ്രതികളിലൊരാളായ ഉമറിന്റെ പെൺസുഹൃത്ത് ഐശ്വര്യയെ പോലീസ് അറസ്റ്റ് ചെയ്തു. വിശദമായ ചോദ്യം ചെയ്യലിന് ശേഷമാണ് ഇവരുടെ അറസ്റ്റ് രേഖപ്പെടുത്തിയത്. കേസിൽ തെളിവ് നശിപ്പിക്കാൻ കൂട്ടുനിന്നതിനും ഉമറുമായി ചേർന്ന് ആസൂത്രണം നടത്തിയതിനുമാണ് ഐശ്വര്യക്കെതിരെ കേസെടുത്തിരിക്കുന്നത്.
കൃത്യം നടന്ന സമയത്ത് രണ്ടാം പ്രതിയായ ഉമർ വീട്ടിൽത്തന്നെ ഉണ്ടായിരുന്നുവെന്ന് വരുത്തിത്തീർത്ത് അന്വേഷണത്തെ വഴിതിരിച്ചുവിടാനാണ് ഇരുവരും പദ്ധതിയിട്ടത്. ഇതിന്റെ ഭാഗമായി കൊലപാതകം നടക്കുമ്പോൾ ഉമറിനെ ഫോണിൽ വിളിച്ച് ആ സമയം വരെ ഐശ്വര്യ സംഭാഷണം തുടരുകയായിരുന്നുവെന്ന് പോലീസ് അന്വേഷണത്തിൽ വ്യക്തമായി.
വ്യക്തമായ ആസൂത്രണത്തോടെയാണ് പ്രതികൾ കൃത്യം നടപ്പാക്കിയതെന്ന് പോലീസ് കണ്ടെത്തിയിട്ടുണ്ട്. കേസിൽ ഉൾപ്പെട്ട ഉമർ നേരത്തെ കാപ്പ തടവ് അനുഭവിച്ചയാളാണ്; ഒന്നാം പ്രതിയായ പതിനേഴുകാരൻ മുൻപ് മോഷണക്കേസിലും പ്രതിയായിരുന്നു.
