തിരുവനന്തപുരം: പാങ്ങപ്പാറയിൽ അഭിറാം കൊല്ലപ്പെട്ട കേസിൽ പ്രതികൾ ലക്ഷ്യമിട്ടിരുന്നത് ഇരട്ടക്കൊലപാതകമെന്ന് പോലീസ് കണ്ടെത്തൽ. രണ്ടാമത്തെ ആളെ വിളിച്ചുവരുത്താൻ തയ്യാറാകാത്തതിലുള്ള വൈരാഗ്യമാണ് അഭിറാമിനെ പ്രതികൾ ക്രൂരമായി മർദ്ദിക്കാൻ ഇടയാക്കിയതെന്നാണ് പ്രാഥമിക നിഗമനം. 16 അംഗ പ്രത്യേക സംഘം അന്വേഷിക്കുന്ന കേസിൽ ഇതുവരെ മൂന്ന് പ്രതികളാണ് അറസ്റ്റിലായിട്ടുള്ളത്.
കൊലപാതകം നടക്കുന്ന സമയത്ത് സൈബർ തെളിവുകൾ ലഭിക്കാതിരിക്കാനും പോലീസിനെ വഴിതെറ്റിക്കാനും പ്രതികൾ കൃത്യമായ നാടകം മെനഞ്ഞു. സംഭവസമയം താൻ വീട്ടിലുണ്ടായിരുന്നുവെന്ന് വരുത്തിത്തീർക്കാൻ രണ്ടാം പ്രതി ഉമർ മൊബൈൽ ഫോൺ വീട്ടിൽ വെയ്ക്കുകയും, കൃത്യം നിർവ്വഹിച്ച് മടങ്ങിയെത്തുന്നതുവരെ കാമുകി ഐശ്വര്യയുമായി ഫോൺ കോൾ തുടരുകയുമായിരുന്നു. ടവർ ലൊക്കേഷൻ തെളിവാകാതിരിക്കാൻ നടത്തിയ ഈ ഗൂഢാലോചനയിൽ പങ്കാളിയായ ഐശ്വര്യക്ക് കൊലപാതകത്തെക്കുറിച്ച് വ്യക്തമായ അറിവുണ്ടായിരുന്നുവെന്ന് പോലീസ് വ്യക്തമാക്കി.
അഭിറാമിന്റെ ഫോൺ തോട്ടിലേക്ക് വലിച്ചെറിഞ്ഞെന്ന പ്രതികളുടെ വാദം പോലീസ് പൂർണ്ണമായി വിശ്വസിച്ചിട്ടില്ല; സ്കൂബ സംഘത്തെ ഉപയോഗിച്ച് തിരച്ചിൽ നടത്തിയെങ്കിലും ഫോൺ കണ്ടെടുക്കാനായിട്ടില്ല. അതേസമയം, അഭിറാമിന്റെ ഇൻസ്റ്റഗ്രാം അക്കൗണ്ടിലെ ഡിലീറ്റ് ചെയ്യപ്പെട്ട നിർണ്ണായക ചാറ്റുകൾ വീണ്ടെടുക്കാൻ സൈബർ സെൽ ശ്രമം തുടങ്ങി. ഇൻസ്റ്റഗ്രാം വിവരങ്ങൾ പങ്കുവെച്ചിരുന്ന പെൺസുഹൃത്തിന്റെ മൊഴി രേഖപ്പെടുത്തുമെന്നും, സംഭവദിവസം അഭിറാം വീട്ടിൽനിന്ന് നടന്നുപോകുന്നതിന്റെ സിസിടിവി ദൃശ്യങ്ങൾ ലഭിച്ചതായും പോലീസ് അറിയിച്ചു.
