ന്യൂഡൽഹി: കാലടി സംസ്കൃത സർവകലാശാലയിൽ സസ്പെൻഷനിലായ വിദ്യാർത്ഥികൾക്ക് പരീക്ഷയെഴുതാൻ സാധിക്കാത്തതുമായി ബന്ധപ്പെട്ട ഹർജിയിൽ അടിയന്തരമായി തീരുമാനമെടുക്കാൻ ഹൈക്കോടതി സിംഗിൾ ബെഞ്ചിന് സുപ്രീം കോടതി നിർദ്ദേശം നൽകി. ജസ്റ്റിസ് പി.എസ്. നരസിംഹ അധ്യക്ഷനായ ബെഞ്ചാണ് ഹർജി ഹൈക്കോടതിയിലേക്ക് വിട്ടത്. അച്ചടക്കനടപടി സ്വീകരിക്കാൻ സർവകലാശാലയ്ക്ക് അധികാരമുണ്ടെങ്കിലും വിദ്യാർത്ഥികളുടെ ഭാവി നശിക്കരുതെന്നും അനുകൂല വിധിയുണ്ടായാൽ അവരുടെ താല്പര്യം സംരക്ഷിക്കണമെന്നും സുപ്രീം കോടതി നിരീക്ഷിച്ചു.
വിദ്യാർത്ഥികൾക്ക് അനുകൂലമായ ഉത്തരവാണ് ഉണ്ടാകുന്നതെങ്കിൽ അവർക്കായി വീണ്ടും പരീക്ഷ നടത്താമെന്ന് സർവകലാശാല സുപ്രീം കോടതിയിൽ സമ്മതിച്ചിട്ടുണ്ട്. ഹാജർനില ഉൾപ്പെടെയുള്ള വിഷയങ്ങൾ പരിശോധിച്ചാകും സിംഗിൾ ബെഞ്ച് വിധി പറയുക; തങ്ങൾക്ക് 65 ശതമാനത്തിൽ കൂടുതൽ ഹാജരുണ്ടെന്നും ഹൈക്കോടതിയിൽ പ്രതീക്ഷയുണ്ടെന്നും വിദ്യാർത്ഥികൾ വ്യക്തമാക്കി.
അതിനിടെ, വിദ്യാർത്ഥികൾ പഠനം തുടരണമെന്നും പരീക്ഷയെഴുതണമെന്നുമാണ് ആഗ്രഹമെങ്കിലും അവർ വെല്ലുവിളിയുടെ സ്വഭാവത്തിലേക്ക് നീങ്ങുകയാണെന്ന് ഉന്നത വിദ്യാഭ്യാസ മന്ത്രി റോജി എം. ജോൺ ആവർത്തിച്ചു. സമരങ്ങളോട് വിയോജിപ്പില്ലെങ്കിലും കാമ്പസിലെ അക്രമങ്ങളെ യാതൊരു കാരണവശാലും അംഗീകരിക്കില്ലെന്നും, വെല്ലുവിളിയുമായി മുന്നോട്ടുപോകുന്ന കാര്യങ്ങൾ നിലവിൽ കോടതിയുടെ പരിഗണനയിലാണെന്നും മന്ത്രി വ്യക്തമാക്കി.
