കൊച്ചി: ചേരാനല്ലൂർ വാഹനാപകടക്കേസിൽ പതിനേഴുകാരന് ജുവനൈൽ ജസ്റ്റിസ് ബോർഡ് അനുവദിച്ച ജാമ്യം റദ്ദാക്കണമെന്നാവശ്യപ്പെട്ട് പോലീസ് സമർപ്പിച്ച അപ്പീലിൽ എറണാകുളം അഡീഷണൽ സെഷൻസ് കോടതി ഇന്ന് വിധി പറയും. അപകടം നടന്ന ദിവസത്തെ സംഭവങ്ങളെക്കുറിച്ച് ചോദിച്ചറിയേണ്ടതുണ്ടെന്നും അതിനാൽ കൗമാരക്കാരനെ ഒബ്‌സർവേഷൻ ഹോമിലേക്ക് അയക്കണമെന്നുമാണ് പോലീസിന്റെ പ്രധാന ആവശ്യം. കുട്ടി സ്ഥിരമായി നിയമലംഘനം നടത്തുന്ന ആളാണെന്ന് അപകടത്തിൽ മരിച്ച ജയബാലകൃഷ്ണന്റെ കുടുംബം കോടതിയെ അറിയിച്ചിരുന്നു.
അതേസമയം, പ്രതിയായ പതിനേഴുകാരന്റെ പിതാവും അഡീഷണൽ ജഡ്ജിയുമായ വ്യക്തി നൽകിയ മുൻകൂർ ജാമ്യാപേക്ഷ ഹൈക്കോടതി ഇന്ന് പരിഗണിക്കും. കേസിൽ ഇദ്ദേഹത്തിന്റെ അറസ്റ്റ് ഹൈക്കോടതി നേരത്തെ തടഞ്ഞിരുന്നു.
എന്നാൽ, മുൻകൂർ ജാമ്യാപേക്ഷയെ ശക്തമായി എതിർത്തുകൊണ്ട് പോലീസ് കോടതിയിൽ റിപ്പോർട്ട് നൽകിയിട്ടുണ്ട്. പ്രതി ഉന്നത സ്വാധീനമുള്ള വ്യക്തിയാണെന്നും പുറത്തുനിന്നാൽ തെളിവുകൾ നശിപ്പിക്കാൻ സാധ്യതയുണ്ടെന്നുമാണ് പോലീസിന്റെ വാദം.
