തിരുവനന്തപുരം: പാങ്ങപ്പാറയിൽ പതിനേഴുകാരനായ അഭിറാം കൊല്ലപ്പെട്ട സംഭവത്തിൽ സമഗ്രമായ അന്വേഷണം നടത്തണമെന്ന് സിപിഐ സംസ്ഥാന സെക്രട്ടറി ബിനോയ് വിശ്വം ആവശ്യപ്പെട്ടു. പ്രതികളെ പ്രായപരിധിയുടെ ഇളവ് ചൂണ്ടിക്കാട്ടി ഒഴിവാക്കാൻ പോലീസ് അമിത താല്പര്യം കാണിക്കുകയാണെന്നും സേനയ്ക്കുള്ളിലും ഇവർക്ക് സംരക്ഷകരുണ്ടോ എന്ന് സംശയിക്കേണ്ടിയിരിക്കുന്നുവെന്നും അദ്ദേഹം ആരോപിച്ചു. ഇത്തരം സമീപനം സർക്കാരിന്റെ പോലീസ് നയത്തിന്റെ ഭാഗമാണോയെന്ന് മുഖ്യമന്ത്രി വ്യക്തമാക്കണമെന്നും അദ്ദേഹം ആവശ്യപ്പെട്ടു.
അതേസമയം, സംഭവത്തിൽ പോലീസിന്റെ ഭാഗത്ത് നിന്ന് യാതൊരു വീഴ്ചയും സംഭവിച്ചിട്ടില്ലെന്ന് വ്യക്തമാക്കി സിറ്റി പോലീസ് കമ്മീഷണർ ക്രമസമാധാന ചുമതലയുള്ള എഡിജിപിക്ക് റിപ്പോർട്ട് കൈമാറി. രാത്രി പത്ത് മണിക്ക് ബന്ധുക്കൾ അഭിറാമിനെ കാണാനില്ലെന്ന് പരാതി നൽകുന്നതിന് മുൻപ് തന്നെ കൊലപാതകം നടന്നിരുന്നുവെന്ന് റിപ്പോർട്ടിൽ ചൂണ്ടിക്കാട്ടുന്നു.
പരാതി കിട്ടിയ ഉടൻ തന്നെ അന്വേഷണം ആരംഭിച്ച് രാത്രിയോടെ തന്നെ ഒന്നാം പ്രതിയെ പോലീസ് കസ്റ്റഡിയിലെടുത്തിരുന്നു. എന്നാൽ പ്രായപൂർത്തിയാകാത്തയാളെ സ്റ്റേഷനിൽ പാർപ്പിക്കാൻ സാധിക്കാത്ത നിയമപരമായ സാഹചര്യം ഉള്ളതിനാലാണ് കുട്ടിയെ മാതാപിതാക്കൾക്കൊപ്പം വിട്ടയച്ചതെന്നും പോലീസ് വിശദീകരിച്ചു.
