തിരുവനന്തപുരം: സെക്രട്ടേറിയറ്റിന് മുന്നിൽ യുവജന സംഘടനകളുമായി ചേർന്ന് സമരം നടത്തിയ എൽപിഎസ്ടി ഉദ്യോഗാർത്ഥികൾക്കെതിരെ കന്റോൺമെന്റ് പോലീസ് പുതിയ കേസ് രജിസ്റ്റർ ചെയ്തു. കാൽനടയാത്രക്കാർക്ക് വഴിത്തടസ്സമുണ്ടാക്കിയെന്നാരോപിച്ച് എടുത്ത കേസിൽ സമരസമിതി സെക്രട്ടറി വളർമതിയാണ് ഒന്നാം പ്രതി; കണ്ടാലറിയാവുന്ന 25 റാങ്ക് ഹോൾഡർമാരെയും കേസിൽ പ്രതിചേർത്തിട്ടുണ്ട്.
നിയമനം നടപ്പാക്കണമെന്നാവശ്യപ്പെട്ട് ഉദ്യോഗാർത്ഥികൾ നടത്തുന്ന പ്രക്ഷോഭത്തിന് പ്രതിപക്ഷ പാർട്ടികളുടെയും വിവിധ യുവജന സംഘടനകളുടെയും പിന്തുണ വർദ്ധിച്ചുവരുന്നതിനിടെയാണ് പോലീസിന്റെ ഈ നടപടി.
തുടർച്ചയായി കേസുകൾ ചുമത്തി ന്യായമായ സമരത്തെ അടിച്ചമർത്താനാണ് സർക്കാർ ശ്രമിക്കുന്നതെന്നും പ്രതികാരബുദ്ധിയോടെയാണ് അധികൃതർ പെരുമാറുന്നതെന്നും ഉദ്യോഗാർത്ഥികൾ കുറ്റപ്പെടുത്തി. ഉന്നയിച്ച ആവശ്യങ്ങൾ അംഗീകരിക്കുംവരെ പ്രക്ഷോഭവുമായി മുന്നോട്ടുപോകുമെന്നും സമരക്കാർ വ്യക്തമാക്കി.
