കണ്ണൂർ: മുൻ ആരോഗ്യമന്ത്രി വീണാ ജോർജിനെ ആക്രമിച്ചെന്ന കേസിൽ കെഎസ്‌യു പ്രവർത്തകർക്കെതിരെ ചുമത്തിയ കുറ്റങ്ങൾ നിലനിൽക്കില്ലെന്ന് വ്യക്തമാക്കി പ്രത്യേക അന്വേഷണ സംഘം (എസ്ഐടി) കോടതിയിൽ അന്തിമ റിപ്പോർട്ട് നൽകി. കരിങ്കൊടി കാണിച്ച് പ്രതിഷേധിക്കുന്നത് ഒരു കുറ്റകൃത്യമല്ലെന്നും ആദ്യ അന്വേഷണ സംഘം കുറ്റപത്രത്തിൽ രേഖപ്പെടുത്തിയ പ്രകാരമുള്ള നിയമലംഘനങ്ങളൊന്നും പ്രതിഷേധക്കാരുടെ ഭാഗത്തുനിന്ന് ഉണ്ടായിട്ടില്ലെന്നും എസ്ഐടി കണ്ടെത്തി.
കണ്ണൂർ ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് എസ്ഐടി തലവൻ യു. പ്രേമൻ സുപ്രധാനമായ അന്തിമ റിപ്പോർട്ട് സമർപ്പിച്ചത്. കണ്ണൂർ റെയിൽവേ സ്റ്റേഷനിൽ നടന്ന സംഭവത്തിൽ റെയിൽവേ പോലീസ് ചുമത്തിയ കലാപശ്രമം, തടഞ്ഞുവെക്കൽ, ഔദ്യോഗിക കൃത്യനിർവ്വഹണം തടസ്സപ്പെടുത്തൽ, അതിക്രമിച്ചുകടക്കൽ തുടങ്ങിയ വകുപ്പുകൾ അസാധുവാണെന്ന് റിപ്പോർട്ടിൽ ചൂണ്ടിക്കാട്ടുന്നു; നേരത്തെ എഫ്ഐആറിലുണ്ടായിരുന്ന വധശ്രമക്കുറ്റം കുറ്റപത്രത്തിൽ ഒഴിവാക്കിയിരുന്നു.
പ്രതിഷേധക്കാരെ തടയുക എന്നതായിരുന്നു മന്ത്രിക്കൊപ്പമുണ്ടായിരുന്ന പോലീസിന്റെ ചുമതലയെന്നും, കരിങ്കൊടി കാട്ടിയവരെ പോലീസ് തടയുക മാത്രമാണ് ചെയ്തതെന്നും റിപ്പോർട്ട് വ്യക്തമാക്കുന്നു. ഔദ്യോഗിക കൃത്യനിർവ്വഹണത്തിന് തടസ്സം വരുത്തുകയോ മന്ത്രിയെ തടഞ്ഞുവെക്കുകയോ ചെയ്തിട്ടില്ല. പ്ലാറ്റ്‌ഫോം ടിക്കറ്റെടുത്താണ് പ്രവർത്തകർ എത്തിയതെന്നതിനാൽ റെയിൽവേ പരിസരത്ത് അതിക്രമിച്ചുകടന്നു എന്ന ആരോപണവും നിലനിൽക്കില്ലെന്ന് അന്വേഷണസംഘം വ്യക്തമാക്കി.
