തിരുവനന്തപുരം: മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിൽ ഒരു കോടി രൂപ ചെലവിൽ അറ്റകുറ്റപ്പണികൾ നടത്താൻ നൽകിയ ഭരണാനുമതി പൊതുമരാമത്ത് വകുപ്പ് റദ്ദാക്കി. ഉത്തരവ് വലിയ വിവാദങ്ങൾക്ക് വഴിവെച്ചതിൽ മുഖ്യമന്ത്രി കടുത്ത അതൃപ്തി പ്രകടിപ്പിക്കുകയും വിഷയത്തിൽ പൊതുമരാമത്ത് സെക്രട്ടറിയോട് അടിയന്തര റിപ്പോർട്ട് ആവശ്യപ്പെടുകയും ചെയ്തിരുന്നു.
ക്ലിഫ് ഹൗസിൽ അനാവശ്യമായ മോടിപിടിപ്പിക്കലുകളോ നിർമ്മാണങ്ങളോ പാടില്ലെന്നും കഴിഞ്ഞ സർക്കാരിന്റെ എസ്റ്റിമേറ്റുകൾ പ്രകാരമുള്ള നവീകരണങ്ങൾ ഒഴിവാക്കി അത്യന്താപേക്ഷിതമായ കാര്യങ്ങൾ മാത്രം ചെയ്താൽ മതിയെന്നും സർക്കാർ അധികാരമേറ്റപ്പോൾ തന്നെ മുഖ്യമന്ത്രി നിർദ്ദേശിച്ചിരുന്നതാണ്. ഈ നിർദ്ദേശം അവഗണിച്ചാണ് ലക്ഷങ്ങളുടെ തുകയടങ്ങിയ പുതിയ ഉത്തരവ് പുറത്തിറങ്ങിയത്.
അതേസമയം, 2022-ൽ തയ്യാറാക്കിയ സേഫ്റ്റി ഓഡിറ്റ് റിപ്പോർട്ടിന്റെ അടിസ്ഥാനത്തിലാണ് ഫണ്ട് അനുവദിച്ച് ഉത്തരവിറക്കിയതെന്നാണ് പൊതുമരാമത്ത് വകുപ്പിന്റെ ഭാഗത്തുനിന്നുള്ള വിശദീകരണം.
