തിരുവനന്തപുരം: ഡിവൈഎസ്പി റാങ്ക് പട്ടികയിൽ എസ്എഫ്ഐ മുൻ നേതാവ് ഒന്നാം സ്ഥാനം നേടിയതിൽ ക്രമക്കേടുണ്ടെന്ന ആരോപണങ്ങൾ പൂർണ്ണമായും തള്ളി കേരള പബ്ലിക് സർവീസ് കമ്മീഷൻ (പിഎസ്‌സി). പരീക്ഷാ നടത്തിപ്പിലോ തുടർനടപടികളിലോ യാതൊരു വീഴ്ചയും സംഭവിച്ചിട്ടില്ലെന്നും പ്രിലിമിനറി, മെയിൻ പരീക്ഷകൾ, കായികക്ഷമതാ പരിശോധന, അഭിമുഖം എന്നിവ കൃത്യമായി പൂർത്തിയാക്കിയാണ് പൂർണ്ണമായും നിയമാനുസൃതമായി റാങ്ക് പട്ടിക തയ്യാറാക്കിയതെന്നും പിഎസ്‌സി വ്യക്തമാക്കി.
എഴുത്തുപരീക്ഷയിൽ മാർക്ക് കുറഞ്ഞ ഉദ്യോഗാർത്ഥിക്ക് അഭിമുഖത്തിൽ അനധികൃതമായി കൂടുതൽ മാർക്ക് നൽകി ഒന്നാമതെത്തിച്ചു എന്നായിരുന്നു സേവ് യൂണിവേഴ്സിറ്റി ക്യാമ്പയിൻ ഉന്നയിച്ച പ്രധാന പരാതി. എന്നാൽ മെയിൻ എഴുത്തുപരീക്ഷയിൽ ഏറ്റവും ഉയർന്ന മാർക്കായ 68.67 ഉം അഭിമുഖത്തിൽ 13 മാർക്കും ജിതിൻ കെ. ജെയ്ക്ക് ലഭിച്ചിട്ടുണ്ടെന്ന് ഔദ്യോഗിക രേഖകൾ വ്യക്തമാക്കുന്നു; പോലീസ് കോൺസ്റ്റബിൾ പട്ടികയിൽ പോലും ഇടംപിടിക്കാത്തയാളാണ് ഒന്നാമതെത്തിയതെന്ന വാദം തള്ളുന്ന അഡ്വൈസ് മെമ്മോ വിവരങ്ങളും പുറത്തുവന്നു.
പിഎസ്‌സി വഴി പ്രത്യേക രാഷ്ട്രീയ പാർട്ടിക്കാർക്ക് അവിഹിതമായി ജോലി നേടാനാകുമെന്ന തെറ്റായ ധാരണ സൃഷ്ടിക്കാനും കമ്മീഷന്റെ പ്രവർത്തനങ്ങളെല്ലാം ക്രമക്കേടാണെന്ന് വരുത്തിത്തീർക്കാനുമുള്ള ആസൂത്രിത നീക്കമാണ് ആരോപണങ്ങൾക്ക് പിന്നിലെന്ന് പിഎസ്‌സി കുറ്റപ്പെടുത്തി.
