തിരുവനന്തപുരം: ഡൽഹി രാംലീലാ മൈതാനിയിൽ ഇന്ത്യാ മുന്നണി സംഘടിപ്പിച്ച പ്രതിഷേധ റാലിയിൽ മുസ്ലിം ലീഗിനെ അവഗണിച്ചെന്ന പരാതിയിൽ ലീഗ് നേതൃത്വത്തിന് പിന്തുണയുമായി കോൺഗ്രസ് നേതാക്കളും രംഗത്ത്. പൊതുസമ്മേളനത്തിൽ ലീഗ് പ്രതിനിധിക്ക് സംസാരിക്കാൻ ഹൈക്കമാൻഡ് അവസരം നൽകിയില്ലെന്നും രാഷ്ട്രപതിയെ സന്ദർശിച്ച സംഘത്തിൽ ലീഗ് നേതാക്കളെ ഉൾപ്പെടുത്തിയില്ലെന്നുമാണ് ഉയർന്ന പ്രധാന പരാതി.

ഹൈക്കമാൻഡിനെതിരെയുള്ള ലീഗിന്റെ നിലപാടിനെ പരസ്യമായി പിന്തുണച്ചുകൊണ്ട് കെ.പി. നൗഷാദ് അലി എംഎൽഎ ഫേസ്ബുക്കിൽ കുറിപ്പ പങ്കുവെച്ചു. രാജ്യം മുന്നണി രാഷ്ട്രീയത്തെക്കുറിച്ച് ചിന്തിച്ചു തുടങ്ങുന്നതിന് മുൻപ്, 1969 മുതൽ കോൺഗ്രസിന്റെ ഏറ്റവും പഴയ വിശ്വസ്ത സഖ്യകക്ഷിയാണ് മുസ്ലിം ലീഗെന്ന് അദ്ദേഹം ചൂണ്ടിക്കാട്ടി.

ഇന്ത്യയിലെ കോൺഗ്രസിന്റെ പ്രമുഖ ലോക്‌സഭാ മണ്ഡലങ്ങളിലൊന്നായ വയനാട്ടിൽ പാർട്ടിയോളം തന്നെ നിർണ്ണായക സ്വാധീനം ലീഗിനുണ്ടെന്നും നല്ല കാലത്തും മോശം ഘട്ടങ്ങളിലും മാറ്റമില്ലാതെ തുടരുന്ന ആ ഐക്യം പൂർണ്ണ പ്രതാപത്തോടെ മുന്നോട്ടുപോകുമെന്നും നൗഷാദ് അലി വ്യക്തമാക്കി.