തിരുവനന്തപുരം: പുതിയ ബാറുകൾക്ക് ലൈസൻസ് അനുവദിച്ചതുമായി ബന്ധപ്പെട്ട വിവാദങ്ങളിൽ വിശദീകരണവുമായി എക്സൈസ് കമ്മീഷണർ ശ്രീറാം സാംബശിവറാവു. നടപടികളിലൊന്നും നിയമവിരുദ്ധമായി യാതൊന്നും സംഭവിച്ചിട്ടില്ലെന്നും നിലവിലുള്ള നിയമങ്ങൾ കർശനമായി പാലിച്ചാണ് തീരുമാനങ്ങളെടുത്തതെന്നും അദ്ദേഹം ട്വന്റിഫോറിനോട് വ്യക്തമാക്കി.
വിഷയത്തിൽ എക്സൈസ് മന്ത്രി രേഖാമൂലം വിശദീകരണം ആവശ്യപ്പെട്ടിട്ടില്ലെന്നും വകുപ്പ് മന്ത്രിക്കുള്ള സമഗ്രമായ റിപ്പോർട്ട് ഉടൻ തന്നെ സമർപ്പിക്കുമെന്നും അദ്ദേഹം അറിയിച്ചു.
സദ്ഭരണമാണ് തന്റെ പ്രധാന ലക്ഷ്യമെന്നും ഫയലുകൾ വേഗത്തിൽ തീർപ്പാക്കുന്ന ശൈലിയാണ് തനിക്കുള്ളതെന്നും അദ്ദേഹം പറഞ്ഞു. ലൈസൻസ് അനുവദിക്കുന്നതിൽ അനാവശ്യ തിടുക്കം കാണിച്ചിട്ടില്ലെന്നും മന്ത്രിക്കൊപ്പം യാതൊരു ഭിന്നതയുമില്ലെന്നും വ്യക്തമാക്കിയ കമ്മീഷണർ, തനിക്കെതിരെ ഉയരുന്ന മാധ്യമവാർത്തകൾ അടിസ്ഥാനരഹിതമാണെന്നും തന്നെ വേട്ടയാടുകയാണെന്നും കൂട്ടിച്ചേർത്തു.
