കോഴിക്കോട്: തൃശൂരിൽ നിർമ്മിക്കുന്ന കേരള ക്ഷേത്ര വാദ്യകലാ അക്കാദമിയുടെ ആസ്ഥാന മന്ദിരത്തിനായി തന്റെ എംപി ഫണ്ടിൽ നിന്ന് 30 ലക്ഷം രൂപ അനുവദിക്കുമെന്ന് കേന്ദ്ര പെട്രോളിയം പ്രകൃതി വാതക സഹമന്ത്രി സുരേഷ് ഗോപി അറിയിച്ചു. ക്ഷേത്ര വാദ്യകലാ അക്കാദമിയുടെ 36-ാമത് സംസ്ഥാന കൺവെൻഷനും അവാർഡ് ദാന ചടങ്ങും ഉദ്ഘാടനം ചെയ്യുകയായിരുന്നു അദ്ദേഹം. 70 ലക്ഷം രൂപയാണ് മന്ദിരത്തിന്റെ ആകെ നിർമ്മാണച്ചെലവെന്നും ഈ തുക കൂടി പരിഗണിക്കുമെന്നും അദ്ദേഹം വ്യക്തമാക്കി.
തൃശൂരിലെ വോട്ടർമാർ തന്നെ തിരഞ്ഞെടുത്തത് വെറുതെയാകില്ലെന്ന് വ്യക്തമാക്കിയ കേന്ദ്രമന്ത്രി, കേരളത്തിൽ കേന്ദ്ര സഹായത്തോടെ നടപ്പിലാക്കുന്ന വിവിധ ടൂറിസം വികസന പദ്ധതികളുടെ പൂർത്തീകരണത്തെക്കുറിച്ചും വിശദീകരിച്ചു. പദ്ധതികളെല്ലാം പൂർത്തിയാകുന്ന മുറയ്ക്ക് പ്രധാനമന്ത്രി നേരിട്ടെത്തി നാടിന് സമർപ്പിക്കും.
വടകര സർഗാലയ പദ്ധതി അടുത്ത വർഷം മാർച്ചോടെ പൂർത്തിയാകും; മലമ്പുഴ, കൊല്ലം, ആലപ്പുഴ, ശിവഗിരി, അരുവിപ്പുറം എന്നിവിടങ്ങളിലെ പദ്ധതികൾ വരും വർഷങ്ങളിൽ പ്രവർത്തനസജ്ജമാകുമെന്നും അദ്ദേഹം കൂട്ടിച്ചേർത്തു.
