തിരുവനന്തപുരം: കാര്യവട്ടം പാങ്ങപ്പാറ സംഗീത നഗർ സ്വദേശി അഭിറാമിനെ അതിക്രൂരമായി കൊലപ്പെടുത്തി ചാക്കിൽകെട്ടി വഴിയരികിൽ തള്ളിയ കേസിൽ മൂന്നുപേരുടെ അറസ്റ്റ് രേഖപ്പെടുത്തി. കൊല്ലപ്പെട്ട അഭിറാമിന്റെ സുഹൃത്തായ പതിനേഴുകാരൻ, ഇയാളുടെ പെൺസുഹൃത്തായ ശ്രീവരാഹം സ്വദേശി അനന്ത (18), ശ്രീകാര്യം സ്വദേശിയും കാപ്പ കേസ് പ്രതിയുമായ ഉമർ എന്നിവരാണ് പിടിയിലായത്. കൊലപാതകവിവരം മുൻകൂട്ടി അറിഞ്ഞിട്ടും പോലീസിനെ അറിയിക്കാതിരുന്നതിനാണ് വിദ്യാർത്ഥിനിയായ പെൺകുട്ടിയെ കേസിൽ പ്രതിചേർത്തത്.
ഞായറാഴ്ച വൈകുന്നേരം കാണാതായ അഭിറാമിനെ തിങ്കളാഴ്ചയാണ് ചാക്കിൽ കെട്ടിയ നിലയിൽ കൊല്ലപ്പെട്ട നിലയിൽ കണ്ടെത്തിയത്. ഓടി രക്ഷപ്പെടാൻ ശ്രമിച്ച അഭിറാമിന്റെ തലയ്ക്ക് കല്ലുകൊണ്ട് ഇടിച്ച് വീഴ്ത്തിയ ശേഷം കഴുത്തുഞെരിച്ച് കൊലപ്പെടുത്തുകയായിരുന്നുവെന്നും, ഒറ്റയ്ക്കാണ് കൃത്യം നടത്തിയതെന്നും തുടർന്ന് മൃതദേഹം മാറ്റാനാണ് ഉമറിനെ വിളിച്ചുവരുത്തിയതെന്നും 17-കാരൻ പോലീസിന് മൊഴി നൽകി. ഇൻസ്റ്റാഗ്രാം വഴി പെൺസുഹൃത്തിനെ അഭിറാം ശല്യം ചെയ്തതിനാണ് ആക്രമിച്ചതെന്ന് ആദ്യം പറഞ്ഞ പ്രതി, പിന്നീട് അഭിറാമിന്റെ മറ്റൊരു സുഹൃത്തിനെ വിളിച്ചുവരുത്താനുള്ള തർക്കത്തിനിടെയാണ് കൊലപാതകം നടന്നതെന്നും പരസ്പരവിരുദ്ധമായി മൊഴി മാറ്റിയിട്ടുണ്ട്.
അതേസമയം, പോലീസിന്റെ ഭാഗത്തുനിന്ന് ഗുരുതരമായ അനാസ്ഥയുണ്ടായെന്ന് അഭിറാമിന്റെ പിതാവ് മധുകുമാർ റിപ്പോർട്ടറോട് പറഞ്ഞു. ഒന്നാം പ്രതിയെ ആദ്യം കസ്റ്റഡിയിലെടുത്ത ശേഷം വിശദമായ ചോദ്യം ചെയ്യലില്ലാതെ വിട്ടയച്ചതാണ് വീഴ്ചയായതെന്നും, പിറ്റേന്ന് വീണ്ടും ചോദ്യം ചെയ്തപ്പോഴാണ് പ്രതി കുറ്റം സമ്മതിച്ചതെന്നും അദ്ദേഹം ചൂണ്ടിക്കാട്ടി; ശിക്ഷാ ഇളവ് ലക്ഷ്യമിട്ടാണ് 17-കാരൻ കുറ്റം സ്വയം ഏറ്റെടുക്കുന്നതെന്നും കുടുംബം ആരോപിച്ചു. വിദേശത്തുള്ള സഹോദരി എത്തിയ ശേഷം അഭിറാമിന്റെ സംസ്കാരം നാളെ നടക്കും.
