കൊച്ചി: കാലടി സംസ്കൃത സർവ്വകലാശാല വൈസ് ചാൻസലർക്കെതിരെ സമരം ചെയ്തതിന് നടപടി നേരിട്ട 16 വിദ്യാർത്ഥികളിൽ 12 പേരുടെ സസ്‌പെൻഷൻ പിൻവലിക്കാൻ സിൻഡിക്കേറ്റ് തീരുമാനിച്ചു. എന്നാൽ ഇവർ രേഖാമൂലം മാപ്പ് എഴുതി നൽകിയാൽ മാത്രമേ നടപടി പിൻവലിക്കൂ എന്ന കർശന നിബന്ധനയും സിൻഡിക്കേറ്റ് മുന്നോട്ടുവെച്ചിട്ടുണ്ട്.

ബാക്കിയുള്ള നാല് വിദ്യാർത്ഥികളുടെ സസ്‌പെൻഷൻ കാലാവധി രണ്ട് മാസത്തേക്ക് കൂടി നീട്ടി. സസ്‌പെൻഷൻ കാലയളവിലെ ചട്ടങ്ങൾ ലംഘിച്ചതിനാലാണ് ഇവർക്കെതിരെ ഇളവ് നൽകാത്തതെന്നാണ് വിശദീകരണം.

വിഷയം സിൻഡിക്കേറ്റ് വിശദമായി ചർച്ച ചെയ്തതിന് പിന്നാലെ അച്ചടക്ക സമിതി റിപ്പോർട്ട് സമർപ്പിക്കുകയായിരുന്നു. അതേസമയം, വിദ്യാർത്ഥികൾക്കെതിരായ അച്ചടക്ക നടപടികൾ പിൻവലിക്കാൻ കഴിയില്ലെന്ന ശക്തമായ നിലപാടിലാണ് വി.സി. സിസ തോമസ്.