തിരുവനന്തപുരം: മഹാരാജാസ് കോളേജിൽ ഉന്നതവിദ്യാഭ്യാസ മന്ത്രി റോജി എം. ജോണിനോട് ചോദ്യങ്ങൾ ഉന്നയിച്ചതിന്റെ പേരിൽ എസ്എഫ്ഐ നേതാവ് നഫീസത്തുൽ മിസ്രിയക്കെതിരെ കോൺഗ്രസ്-ലീഗ് പ്രവർത്തകർ സമൂഹമാധ്യമങ്ങളിലൂടെ നടത്തുന്ന സൈബർ ആക്രമണവും, വിദ്യാർത്ഥികൾക്കെതിരായ പോലീസിന്റെ ഭരണകൂട വേട്ടയും ജനാധിപത്യ-മനുഷ്യത്വ വിരുദ്ധമാണെന്ന് പ്രതിപക്ഷ നേതാവ് പിണറായി വിജയൻ വ്യക്തമാക്കി. വിദ്യാർത്ഥികൾക്ക് നേരെ നടക്കുന്ന ഇത്തരം യുദ്ധപ്രഖ്യാപനങ്ങൾക്കെതിരെ അതിശക്തമായ പ്രതിഷേധം ഉയർന്നുവരുമെന്നും അദ്ദേഹം മുന്നറിയിപ്പ് നൽകി.
എംജി സർവകലാശാലയിൽ സംഘപരിവാർ നോമിനിയെ വിസിയായി നിയമിച്ചപ്പോഴും, സെനറ്റിലും സിൻഡിക്കേറ്റിലും ആർഎസ്എസ് അനുകൂലികളെ ഉൾപ്പെടുത്തിയപ്പോഴും, കാലിക്കറ്റ് പഠനബോർഡുകളിൽ 32 ആർഎസ്എസുകാരെ നിയോഗിച്ചപ്പോഴും മന്ത്രി നിസ്സംഗത തുടരുകയായിരുന്നുവെന്ന് പിണറായി വിജയൻ കുറ്റപ്പെടുത്തി. മുൻ ഗവർണറുടെ നോമിനിയായ കാലടി സർവകലാശാലാ വിസിയുടെ വിദ്യാർത്ഥിവിരുദ്ധ നീക്കങ്ങൾക്ക് കൂട്ടുനിന്ന സ്ഥലം എംഎൽഎ കൂടിയായ മന്ത്രിയുടെ സംഘപരിവാർ വിധേയത്വമാണ് വിദ്യാർത്ഥികൾ ചോദ്യം ചെയ്തതെന്നും അദ്ദേഹം ചൂണ്ടിക്കാട്ടി.
തദ്ദേശ സ്വയംഭരണ വകുപ്പ് മന്ത്രിയെ വഴിയിൽ തടഞ്ഞ് അപമാനിച്ച സംഘപരിവാറുകാർക്കെതിരെ പെറ്റിക്കേസ് പോലും എടുക്കാത്ത പോലീസാണ്, മന്ത്രിയോട് ചോദ്യങ്ങൾ ചോദിച്ച വിദ്യാർത്ഥികൾക്കെതിരെ അർദ്ധരാത്രിയിൽ ജാമ്യമില്ലാ വകുപ്പുകൾ ചുമത്തി പ്രതികാര നടപടികൾ കൈക്കൊള്ളുന്നതെന്ന് അദ്ദേഹം പറഞ്ഞു. ഇത് സർക്കാരിന്റെ പ്രകടമായ ഇരട്ടത്താപ്പും പ്രീണന രാഷ്ട്രീയവുമാണെന്നും പ്രതിപക്ഷ നേതാവ് വ്യക്തമാക്കി.
