പാലക്കാട്: വിവാദ യൂട്യൂബർ ഷാജൻ സ്കറിയയുടെ വസതിയിലെത്തി മുഖ്യമന്ത്രി വി.ഡി. സതീശനും മന്ത്രിമാരും കൂടിക്കാഴ്ച നടത്തിയ സംഭവത്തിൽ പി.വി. അൻവർ നിലപാട് വ്യക്തമാക്കണമെന്ന് സിപിഐഎം നേതാവ് പി. സരിൻ ആവശ്യപ്പെട്ടു. ഷാജൻ സ്കറിയക്കെതിരായ പഴയ പോരാട്ടത്തിൽ ആത്മാർത്ഥതയുടെ ഒരംശമെങ്കിലും ബാക്കിയുണ്ടെങ്കിൽ മുഖ്യമന്ത്രിക്ക് കത്തയക്കാനും മാധ്യമങ്ങൾക്ക് മുന്നിലെത്തി പ്രതികരിക്കാനും അൻവർ തയ്യാറാകണമെന്ന് സരിൻ പറഞ്ഞു. പത്മശ്രീ ജേതാവ് ചെറുവയൽ രാമന്റെ മരണാനന്തര ചടങ്ങുകൾ പോലും ഒഴിവാക്കിയവരാണ് സാമൂഹിക വിപത്തായ ഒരാൾക്ക് ഈ അംഗീകാരം നൽകിയതെന്നും അദ്ദേഹം കുറ്റപ്പെടുത്തി.
ഷാജനെതിരായ ജനവികാരം മുതലെടുത്താണ് അൻവർ വളർന്നതെന്നും, ഷാജനെ അറസ്റ്റ് ചെയ്യാതെ ഒത്തുകളിച്ചെന്നാരോപിച്ചാണ് എഡിജിപി എം.ആർ. അജിത് കുമാറിനും പി. ശശിക്കുമെതിരെ അൻവർ തിരിഞ്ഞതെന്നും സരിൻ ചൂണ്ടിക്കാട്ടി. ഈ ആരോപണങ്ങൾ പിന്നീട് പാർട്ടിക്കും മുഖ്യമന്ത്രിക്കുമെതിരായ നിലപാടായി വളരുകയും ഒടുവിൽ ഇടതുമുന്നണി വിടുന്നതിലേക്ക് നയിക്കുകയുമായിരുന്നു. നിലമ്പൂർ, ബേപ്പൂർ തെരഞ്ഞെടുപ്പ് കാലത്തും ഈ വിഷയങ്ങൾ ആയുധമാക്കിയ അൻവറിന് ഇന്ന് മുഖ്യമന്ത്രിയുടെ വസതിയിൽ കയറണമെങ്കിൽ കാൽപിടിച്ച് അനുവാദം വാങ്ങേണ്ട അവസ്ഥയാണെന്നും അദ്ദേഹം പരിഹസിച്ചു.
രാഹുൽ ഗാന്ധിക്കെതിരെ ഏറ്റവും തരംതാണ പരാമർശങ്ങൾ നടത്തിയ വ്യക്തിക്കാണ് ഭരണനേതൃത്വം അംഗീകാരം നൽകിയതെന്ന ചർച്ചകൾ ഉയരുന്നുണ്ടെന്ന് സരിൻ വ്യക്തമാക്കി. ഷാജൻ സ്കറിയയുടെ ഏറ്റവും പ്രിയപ്പെട്ടവർ എന്ന നിലയിൽ കോൺഗ്രസുകാർ നടത്തിയ നയപരമായ ഇടപെടലാണിതെന്നും, കപടത നിറഞ്ഞ സന്ദർശകരിൽ നിന്ന് പശ്ചാത്താപം പ്രതീക്ഷിക്കുന്നില്ലെന്നും അദ്ദേഹം തുറന്നടിച്ചു.
