കൊച്ചി: മഹാരാജാസ് കോളേജിലെ ബിരുദദാന ചടങ്ങ് രാഷ്ട്രീയ ലാഭത്തിനായി എസ്എഫ്ഐ അലങ്കോലമാക്കാൻ ശ്രമിച്ചതിനെ രൂക്ഷമായി അപലപിച്ച് ഉന്നതവിദ്യാഭ്യാസ മന്ത്രി റോജി എം. ജോൺ. നൂറുകണക്കിന് വിദ്യാർത്ഥികളും രക്ഷിതാക്കളും പങ്കെടുത്ത മനോഹര നിമിഷത്തെ തകർക്കാനുള്ള നീക്കങ്ങൾക്ക് വഴങ്ങില്ലെന്നും വിരട്ടലുകൾക്ക് മുന്നിൽ താനോ വകുപ്പോ പതറില്ലെന്നും അദ്ദേഹം വ്യക്തമാക്കി. സദസ്സിൽ നിന്ന് ചോദ്യം ഉയർന്നപ്പോൾ ധാർഷ്ട്യം കാണിക്കാതെ അവരുടെ പ്രതിഷേധിക്കാനും ബാനർ പിടിക്കാനുമുള്ള അവകാശത്തെ രാഷ്ട്രീയ മര്യാദയോടെ അംഗീകരിക്കുകയാണ് ചെയ്തതെന്നും, കിലോമീറ്ററുകൾക്കപ്പുറം കറുത്ത മാസ്കും വസ്ത്രവും അഴിപ്പിച്ച പിണറായിക്കാലമല്ല ഇതെന്നും അദ്ദേഹം കൂട്ടിച്ചേർത്തു.
മഹാരാജാസ് കോളേജിൽ മന്ത്രി ഉദ്ഘാടന പ്രസംഗം നടത്തുന്നതിനിടെയാണ് നാടകീയ രംഗങ്ങൾ അരങ്ങേറിയത്. കാലടി സംസ്കൃത സർവകലാശാലയിലെ വിദ്യാർത്ഥികളുടെ സസ്പെൻഷൻ നടപടിയുമായി ബന്ധപ്പെട്ട് സദസ്സിൽ നിന്നും തുടർന്ന് വേദിയിലെത്തിയ യൂണിയൻ വൈസ് ചെയർപേഴ്സൺ നഫീസത്തുൽ മിസ്രിയയും മന്ത്രിക്കെതിരെ ചോദ്യങ്ങൾ ഉയർത്തുകയായിരുന്നു. രണ്ട് ചോദ്യങ്ങളെ എന്തിനാണ് ഭയക്കുന്നതെന്ന് മിസ്രിയ ചോദിച്ചപ്പോൾ, മറുപടി നൽകാമെന്ന് വ്യക്തമാക്കിയതാണെന്നും പരിപാടി തടസ്സപ്പെടുത്തുന്നത് എന്തിനാണെന്നും മന്ത്രി തിരിച്ചുചോദിച്ചു.
തുടർന്ന് 'കാലടിയിലെ വിദ്യാർത്ഥികളെ നിങ്ങൾ മറന്നാലും ഞങ്ങൾ മറക്കില്ല', 'വിദ്യാർത്ഥികളെ എന്തിന് സസ്പെൻഡ് ചെയ്തു' തുടങ്ങിയ വാചകങ്ങളെഴുതിയ ബാനറുകളുമായി എസ്എഫ്ഐ പ്രവർത്തകർ വേദി വളഞ്ഞു. ചോദ്യം ഉന്നയിച്ച മിസ്രിയയെ സുരക്ഷാ ജീവനക്കാർ നീക്കാൻ ശ്രമിച്ചതോടെ പ്രതിഷേധം കനത്തു. ഇരുപത് മിനിറ്റോളം വേദിയിൽ തുടർന്ന് പറയാനുള്ള കാര്യങ്ങൾ വ്യക്തമാക്കിയ ശേഷമാണ് താൻ മടങ്ങിയതെന്നും, പറയാനുള്ളത് പറയാതെ മഹാരാജാസെന്നല്ല ഒരു വേദിയിൽ നിന്നും ഇറങ്ങിപ്പോകില്ലെന്നും മന്ത്രി റോജി എം. ജോൺ വ്യക്തമാക്കി.
