കൊച്ചി: കാലടി സംസ്കൃത സർവകലാശാലയിലെ വിദ്യാർത്ഥി സമരത്തിനെതിരായ പ്രസ്താവന പിൻവലിച്ച് ഉന്നതവിദ്യാഭ്യാസ മന്ത്രി റോജി എം. ജോൺ മാപ്പ് പറയണമെന്ന് മഹാരാജാസ് കോളേജ് യൂണിയൻ വൈസ് ചെയർപേഴ്സൺ നഫീസത്തുൽ മിസ്രിയ ആവശ്യപ്പെട്ടു. അടിസ്ഥാന സൗകര്യങ്ങൾക്കായി സമരം ചെയ്ത വിദ്യാർത്ഥികളെ അപരിഷ്കൃതരെന്നു മുദ്രകുത്തിയ മന്ത്രിയുടെ പ്രസ്താവന കാരണമാണ് 16 വിദ്യാർത്ഥികൾ 60 ദിവസമായി സസ്പെൻഷനിലായതും അവരുടെ ഭാവിയും ഉപരിപഠനവും അനിശ്ചിതത്വത്തിലായതെന്നും മിസ്രിയ ആരോപിച്ചു. സംഘപരിവാറിന് ഒത്താശ ചെയ്യുന്ന മന്ത്രിയിൽ നിന്ന് കൂടുതലൊന്നും പ്രതീക്ഷിക്കുന്നില്ലെന്നും അവർ തുറന്നടിച്ചു.
മഹാരാജാസ് കോളേജിൽ നടന്ന ബിരുദദാന ചടങ്ങ് അലങ്കോലപ്പെടുത്തിയിട്ടില്ലെന്നും പരിപാടി തടസ്സപ്പെടുത്താൻ ലക്ഷ്യമിട്ടിരുന്നെങ്കിൽ വിദ്യാർത്ഥികൾക്ക് സർട്ടിഫിക്കറ്റ് ലഭിച്ച് ചടങ്ങ് പൂർത്തിയാകുമായിരുന്നില്ലെന്നും യൂണിയൻ വൈസ് ചെയർപേഴ്സൺ വ്യക്തമാക്കി. പരിപാടിയിലേക്കോ ഉദ്ഘാടന പ്രസംഗത്തിലേക്കോ കടന്നുകയറിയിട്ടില്ല; പ്രസംഗം പൂർത്തിയായ ശേഷം ചോദ്യങ്ങൾ ചോദിക്കുക മാത്രമാണ് ചെയ്തത്. ജന്തർ മന്തറിലടക്കം വിദ്യാർത്ഥികൾ നടത്തിയത് അപരിഷ്കൃത സമരങ്ങളാണോ എന്ന് ചോദിച്ച മിസ്രിയ, താൻ ഒറ്റയ്ക്ക് ചെന്ന് ചോദ്യം ചോദിച്ചത് മന്ത്രിക്ക് എങ്ങനെ ഭീഷണിയാകുമെന്നും ചോദിച്ചു.
ഉച്ചയ്ക്ക് രണ്ട് മണിക്ക് ആരംഭിച്ച ബിരുദദാന ചടങ്ങിൽ മന്ത്രി സംസാരിക്കവേ സദസ്സിൽ നിന്നും വിദ്യാർത്ഥികൾ കാലടിയിലെ വിഷയം ഉയർത്തി ചോദ്യങ്ങൾ ചോദിച്ചിരുന്നു. തുടർന്ന് വേദിയിലെത്തിയ മിസ്രിയ രണ്ട് ചോദ്യങ്ങളെ എന്തിനാണ് ഭയക്കുന്നതെന്ന് ചോദിച്ചപ്പോൾ പരിപാടി തടസ്സപ്പെടുത്തുന്നത് എന്തിനാണെന്നും പിന്നീട് മറുപടി നൽകാമെന്നും മന്ത്രി പറഞ്ഞു. ഇതിനിടെ ബാനറുകളുമായി എസ്എഫ്ഐ പ്രവർത്തകർ വേദി വളയുകയും ചോദ്യം ഉന്നയിച്ച മിസ്രിയയെ സുരക്ഷാ ജീവനക്കാർ മാറ്റാൻ ശ്രമിച്ചതോടെ പ്രതിഷേധം കനക്കുകയും ചെയ്തതോടെ മന്ത്രി പ്രസംഗം ചുരുക്കി മടങ്ങുകയായിരുന്നു.
റിപ്പോർട്ടർ ചാനലിനോടാണ് മിസ്രിയയുടെ പ്രതികരണം.
