തിരുവനന്തപുരം: നിപ ബാധിതർക്ക് കാലാവധി കഴിഞ്ഞ മരുന്ന് നൽകിയെന്ന ആരോഗ്യമന്ത്രി കെ. മുരളീധരന്റെ പ്രസ്താവന പൂർണ്ണമായും തെറ്റാണെന്നും മന്ത്രി പൊതുസമൂഹത്തോട് പരസ്യമായി മാപ്പ് പറയണമെന്നും പ്രതിപക്ഷ നേതാവ് പിണറായി വിജയൻ. എസ്എംഎ ഉൾപ്പെടെയുള്ള വിഷയങ്ങളിലെ സർക്കാരിന്റെ ഗുരുതര അനാസ്ഥകളിൽ നിന്ന് ശ്രദ്ധ തിരിക്കാനാണ് അടിസ്ഥാനരഹിതമായ വിവാദം ഉണ്ടാക്കി ജനങ്ങളിൽ ഭീതി പടർത്തുന്നതെന്നും വിഷയത്തിൽ മുഖ്യമന്ത്രി അടിയന്തരമായി ഇടപെടണമെന്നും അദ്ദേഹം ആവശ്യപ്പെട്ടു.
കോഴിക്കോട് ഗവൺമെന്റ് മെഡിക്കൽ കോളേജിൽ നിപ ബാധിച്ച് മരിച്ചവർക്ക് കാലാവധി കഴിഞ്ഞ റെംഡെസിവിർ നൽകിയെന്ന ആരോപണം പച്ചക്കള്ളമാണെന്ന് ഔദ്യോഗിക രേഖകൾ ഇതിനകം തെളിയിച്ചതാണ്. 2023-25 കാലഘട്ടത്തിൽ നിപ ബാധിച്ച 13 പേരിൽ മരണപ്പെട്ട 6 പേരിൽ ഒരാൾ പോലും മെഡിക്കൽ കോളേജിൽ നിന്ന് ഈ മരുന്ന് സ്വീകരിച്ചിട്ടില്ലെന്നിരിക്കെ, സഭയെയും ജനങ്ങളെയും തെറ്റിദ്ധരിപ്പിക്കാൻ മന്ത്രി തയ്യാറായത് എന്തിനാണെന്ന് അദ്ദേഹം ചോദിച്ചു.
സിസ്റ്റർ ലിനി ഉൾപ്പെടെ ജീവൻ ബലിയർപ്പിച്ച ആരോഗ്യപ്രവർത്തകരുടെ ആത്മസമർപ്പണത്തെയും ലോകം അംഗീകരിച്ച കേരളത്തിന്റെ നിപ പ്രതിരോധ മാതൃകയെയും മന്ത്രിയുടെ പ്രസ്താവന അപമാനിക്കുകയാണെന്ന് പിണറായി വിജയൻ പറഞ്ഞു. ഭരണപരാജയങ്ങൾ മറച്ചുവെക്കാനും സാധാരണക്കാരുടെ ആശ്രയമായ പൊതുജനാരോഗ്യ സംവിധാനത്തെ തകർത്ത് സ്വകാര്യ ആശുപത്രി ലോബികളെ സഹായിക്കാനുമാണോ ഈ നീക്കമെന്നും അദ്ദേഹം ആരോപിച്ചു.
