ഹരിപ്പാട്: ലഹരിക്കെതിരായ സർക്കാരിന്റെ ഏറ്റവും പ്രധാന സംരംഭമായ 'ഓപ്പറേഷൻ തൂഫാനെ' അട്ടിമറിക്കാൻ ശ്രമിക്കുന്ന ഏതൊരു പോലീസ് ഉദ്യോഗസ്ഥനെയും സർവീസിൽ നിന്ന് പുറത്താക്കുമെന്ന് ആഭ്യന്തരമന്ത്രി രമേശ് ചെന്നിത്തല മുന്നറിയിപ്പ് നൽകി. തൊണ്ടിമുതൽ തിരിമറി നടത്തിയവർക്കെതിരെ വിട്ടുവീഴ്ചയില്ലാത്ത നടപടിയുണ്ടാകുമെന്നതിന്റെ തെളിവാണ് കൊച്ചിയിലെ സംഭവമെന്നും, സേനയിൽ കൃത്രിമം കാണിക്കുന്നവർക്ക് ഒരു തരത്തിലുള്ള സംരക്ഷണവും ലഭിക്കില്ലെന്നും അദ്ദേഹം വ്യക്തമാക്കി.
സംസ്ഥാന ആഭ്യന്തര വകുപ്പും തദ്ദേശ സ്വയംഭരണ വകുപ്പും ഹരിപ്പാട് നഗരസഭയും ചേർന്ന് സംഘടിപ്പിച്ച 'തൂഫാൻ 2.0 തദ്ദേശം ഹരിപ്പാട്' പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മയക്കുമരുന്ന് ഉപയോഗം കാരണം കുട്ടികളുടെ മാനസികാരോഗ്യം തകരാറിലാകുന്നതും ഭാവി നശിക്കുന്നതും തടയാനാണ് സർക്കാർ ഈ ദൗത്യം രൂപീകരിച്ചതെന്നും ലഹരിയുടെ വേരറുക്കും വരെ ഇത് അതിശക്തമായി മുന്നോട്ട് കൊണ്ടുപോകുമെന്നും മന്ത്രി പറഞ്ഞു.
സേനയിലെ 99 ശതമാനം ഉദ്യോഗസ്ഥരും കടുത്ത ആത്മാർത്ഥതയോടെയാണ് ദൗത്യത്തിൽ പങ്കാളികളാകുന്നതെന്നും പദ്ധതിക്ക് പൊതുജനങ്ങളിൽ നിന്ന് വലിയ തോതിലുള്ള പിന്തുണ ലഭിക്കുന്നുണ്ടെന്നും മന്ത്രി ചൂണ്ടിക്കാട്ടി. തദ്ദേശ വകുപ്പിന്റെ സഹകരണത്തോടെ കേരളത്തെയും പുതുതലമുറയെയും വിമുക്തിയിലേക്ക് നയിക്കാനാണ് സർക്കാർ ലക്ഷ്യമിടുന്നത്.
