തിരുവനന്തപുരം: മലേഷ്യൻ എൻജിനീയർ ലീ സീ ബിൻ ജീവനൊടുക്കാൻ കാരണം നിലവിലെ മുഖ്യ തെരഞ്ഞെടുപ്പ് കമ്മീഷണറും മുൻ പൊതുമരാമത്ത് സെക്രട്ടറിയുമായിരുന്ന ഗ്യാനേഷ് കുമാറാണെന്ന ഗുരുതര ആരോപണവുമായി പതിബെൽ കമ്പനിയിലെ മെറ്റീരിയൽ സപ്ലൈ കരാറുകാരനായ സാജൻ. നിർമ്മാണ ബില്ലുകൾ മാറിനൽകാൻ ഗ്യാനേഷ് കുമാർ രണ്ട് കോടി രൂപ കൈക്കൂലി ആവശ്യപ്പെട്ടെന്നും, ഇത് നൽകാത്തതിനെ തുടർന്ന് ബില്ലുകൾ തടഞ്ഞുവെച്ചതാണ് ലിയെ കടുത്ത പ്രതിസന്ധിയിലേക്കും ആത്മഹത്യയിലേക്കും തള്ളിവിട്ടതെന്നും ചൂണ്ടിക്കാട്ടി സാജൻ വിജിലൻസ് ഡയറക്ടർക്ക് പരാതി നൽകി.
കെഎസ്ടിപിയുടെ കീഴിൽ എംസി റോഡ് പുനർനിർമ്മാണ കരാർ ഏറ്റെടുത്ത പതിബെൽ കമ്പനിയുടെ ചീഫ് പ്രോജക്ട് മാനേജറായിരുന്നു ലീ സീ ബിൻ. ബില്ലുകൾ പാസാകാതെ വന്നതോടെ കരാറുകാർക്ക് പണം നൽകാൻ കഴിയാതെ വന്ന ലീ, മലേഷ്യൻ കമ്പനി അറിയാതെ അവരുടെ ബെംഗളൂരു പ്രൊജക്റ്റിൽ നിന്ന് പണം കടമെടുത്താണ് കേരളത്തിലെ കാര്യങ്ങൾ മുന്നോട്ടുകൊണ്ടുപോയത്; എന്നാൽ ബില്ലുകൾ തുടർന്നും മാറിയില്ല. 2006-ൽ മലേഷ്യയിലെ സുബാങ് റിയ പാർക്കിലെ തടാകത്തിന് സമീപമുള്ള ഇരുമ്പ് നടപ്പാലത്തിന് കീഴിൽ ആത്മഹത്യ ചെയ്ത നിലയിൽ കണ്ടെത്തിയ ലീയുടെ പക്കൽ നിന്ന് കമ്പനി ഡയറക്ടർ റോസ് ലീക്കും കുടുംബത്തിനുമായി എഴുതിയ രണ്ട് കുറിപ്പുകൾ പോലീസ് കണ്ടെടുത്തിരുന്നു; കേരളത്തിലെ ഉദ്യോഗസ്ഥരുടെ കടുത്ത അഴിമതിയെക്കുറിച്ചും പദ്ധതി തടസ്സപ്പെടുത്തുന്നതിനെക്കുറിച്ചും ഇതിൽ വ്യക്തമാക്കിയിരുന്നു.
അഴിമതി ആരോപണങ്ങൾ ഉയർന്നതോടെ അന്ന് ഗ്യാനേഷ് കുമാറിനെ പൊതുമരാമത്ത് സെക്രട്ടറി സ്ഥാനത്തുനിന്ന് മാറ്റിയിരുന്നു. തുടർന്ന് വിജിലൻസ് അന്വേഷണം നടത്തുകയും 2007-ൽ സർക്കാർ പതിബെൽ കമ്പനിക്ക് 35 കോടി രൂപ നഷ്ടപരിഹാരം നൽകുകയും ചെയ്തു. 2016-ൽ കേന്ദ്ര ഡെപ്യൂട്ടേഷനിൽ പ്രവേശിച്ച ഗ്യാനേഷ് കുമാർ, 2025 ഫെബ്രുവരി 19-നാണ് മുഖ്യ തെരഞ്ഞെടുപ്പ് കമ്മീഷണറായി നിയമിതനായത്.
