കോഴിക്കോട്: മൾട്ടി സ്റ്റേറ്റ് കോ-ഓപ്പറേറ്റീവ് സൊസൈറ്റിയുടെ മറവിൽ കോടികളുടെ സാമ്പത്തിക തട്ടിപ്പ് നടത്തിയ കേസിൽ ഭാരത് ലെജ്ന മൾട്ടി സ്റ്റേറ്റ് കോ-ഓപ്പറേറ്റീവ് സൊസൈറ്റി (ബിഎൽഎം) ചെയർമാൻ പ്രേംകുമാറിന് കോടതി ജാമ്യം അനുവദിച്ചു. ചെന്നൈയിൽ നിന്നും കഴിഞ്ഞ ദിവസം കോഴിക്കോട് ക്രൈംബ്രാഞ്ച് സംഘം ഇയാളെ അറസ്റ്റ് ചെയ്തിരുന്നു. കോഴിക്കോട് നടക്കാവ് പോലീസ് സ്റ്റേഷനിൽ ആദ്യം രജിസ്റ്റർ ചെയ്ത കേസ് പിന്നീട് വിശദമായ അന്വേഷണത്തിനായി ക്രൈംബ്രാഞ്ചിന്റെ സാമ്പത്തിക കുറ്റാന്വേഷണ വിഭാഗത്തിന് കൈമാറുകയായിരുന്നു.
ബിഎൽഎം ഹൗസിങ് കോ-ഓപ്പറേറ്റീവ് സൊസൈറ്റി വഴി സ്വീകരിച്ച നിക്ഷേപം വകമാറ്റി സ്വകാര്യ ആവശ്യങ്ങൾക്കും നിക്ഷേപങ്ങൾക്കുമായി ഉപയോഗിച്ചെന്നും ഏകദേശം 5,000 കോടി രൂപയുടെ തിരിമറി നടന്നെന്നുമാണ് ക്രൈംബ്രാഞ്ച് കോടതിയിൽ സമർപ്പിച്ച റിപ്പോർട്ടിൽ വ്യക്തമാക്കുന്നത്. ചെന്നൈ ആസ്ഥാനമായുള്ള ഈ സൊസൈറ്റിക്ക് തമിഴ്‌നാട്, പോണ്ടിച്ചേരി എന്നിവിടങ്ങൾക്ക് പുറമെ കേരളത്തിൽ മാത്രം 130 ശാഖകളാണ് പ്രവർത്തിക്കുന്നത്.
അതിനിടെ പ്രേംകുമാറിന്റെ അറസ്റ്റ് തമിഴ്‌നാട്ടിലും രാഷ്ട്രീയ ചർച്ചകൾക്ക് വഴിവെച്ചിട്ടുണ്ട്. തമിഴ്‌നാട് മുഖ്യമന്ത്രി സി. ജോസഫ് വിജയ്‌ക്കൊപ്പം പ്രേംകുമാർ നിൽക്കുന്ന ചിത്രം പുറത്തുവന്നതാണ് വിവാദങ്ങൾക്ക് കാരണമായത്; എന്നാൽ ജൂലൈ മൂന്നിന് ഒരു തമിഴ് ചാനലിന്റെ ഡയറക്ടർമാർക്കൊപ്പമാണ് പ്രേംകുമാർ എത്തിയതെന്നും സെക്രട്ടേറിയറ്റിൽ വെച്ച് മറ്റുള്ളവർക്കൊപ്പം നിന്ന് ചിത്രമെടുക്കുക മാത്രമാണ് ഉണ്ടായതെന്നും മുഖ്യമന്ത്രിയുടെ ഓഫീസ് വിശദീകരിച്ചു.
