സംസ്ഥാനത്ത് പുതിയ മദ്യനയം നവംബറിൽ പ്രഖ്യാപിക്കുമെന്ന് മന്ത്രി എം. ലിജു വ്യക്തമാക്കി. ഇതുമായി ബന്ധപ്പെട്ട പ്രാഥമിക ഘട്ട ചർച്ചകൾ പൂർത്തിയായിക്കഴിഞ്ഞു. ടൂറിസം മേഖലയുടെ ആവശ്യങ്ങൾ പരിഗണിച്ച് കേരളത്തിന്റെ സാഹചര്യങ്ങൾക്ക് യോജിച്ച നയമാണ് പ്രഖ്യാപിക്കുകയെന്ന് അദ്ദേഹം അറിയിച്ചു.
സംസ്ഥാനത്ത് 'റെസ്‌പോൺസിബിൾ ഡ്രിങ്കിംഗ്' എന്ന സംസ്കാരം വളർത്തിയെടുക്കാനാണ് സർക്കാർ ലക്ഷ്യമിടുന്നത്. ലഹരിയുടെ ഉപയോഗം കുറയ്ക്കുകയും അതോടൊപ്പം ടൂറിസം മേഖലയ്ക്ക് മങ്ങലേൽക്കാതിരിക്കുകയും ചെയ്യുന്ന സന്തുലിതമായ സമീപനമാണ് സർക്കാർ സ്വീകരിക്കുന്നതെന്നും മന്ത്രി വ്യക്തമാക്കി.
കർഷകർക്ക് ഗുണകരമാണെങ്കിലും ബേക്കറികൾ മുഖേനയുള്ള ഹോർട്ടി വൈൻ വിതരണമെന്നത് ലാഘവത്തോടെ സമീപിക്കേണ്ട ഒന്നല്ലെന്ന് അദ്ദേഹം ചൂണ്ടിക്കാട്ടി. കൃഷിക്കാർക്ക് ഇത് നേട്ടമുണ്ടാക്കുമെങ്കിലും വിതരണം നടത്തുമ്പോൾ സാമൂഹിക ഉത്തരവാദിത്തം കർശനമായി പാലിക്കപ്പെടണമെന്നും എം. ലിജു കൂട്ടിച്ചേർത്തു.
