തിരുവനന്തപുരം: വിഴിഞ്ഞം അന്താരാഷ്ട്ര തുറമുഖത്ത് എക്സിം (കയറ്റുമതി-ഇറക്കുമതി) പ്രവർത്തനങ്ങൾക്ക് തുടക്കമിട്ടതിന് ശേഷമുള്ള ആദ്യ ഇറക്കുമതി ചരക്കുമായി 'എംഎസ്സി സബ്രീന' ഇന്ന് വൈകുന്നേരത്തോടെ നങ്കൂരമിടും. ചൈനയിൽ നിന്ന് പിവിസി ഫോമുകളുമായി എത്തുന്ന കപ്പലിന് നവംബർ മൂന്നിന് തുറമുഖത്ത് ഔദ്യോഗിക സ്വീകരണം നൽകും. എക്സിം സർവീസുകൾ ആരംഭിച്ച് രണ്ടുമാസം പിന്നിടുമ്പോഴാണ് അടിസ്ഥാന സൗകര്യങ്ങളുടെ നിർമ്മാണം പൂർത്തിയാക്കി ആദ്യ ഇറക്കുമതി കണ്ടെയ്നർ വിഴിഞ്ഞത്ത് എത്തുന്നത്; ഇതോടെ തുറമുഖത്തെ സമുദ്രവ്യാപാര പ്രവർത്തനങ്ങൾ പൂർണ്ണതോതിലാകും.
നേരത്തെ, തിരുവനന്തപുരം നിലമേൽ എക്‌സ്‌പോർട്‌സിന്റെ ഭക്ഷ്യ ഉൽപ്പന്നങ്ങൾ അടങ്ങിയ ഒരു കണ്ടെയ്നർ സ്പെയിനിലെ വലൻസിയ തുറമുഖത്തേക്ക് വിഴിഞ്ഞം വഴി കയറ്റുമതി ചെയ്തിരുന്നു. തലസ്ഥാനം ആസ്ഥാനമായി പ്രവർത്തിക്കുന്ന വാട്ടർലൈൻ ഷിപ്പിങ് ആൻഡ് ലോജിസ്റ്റിക്സ് കമ്പനിയും ആസ്പിൻ വോൾ ഷിപ്പിങ് കമ്പനിയുമാണ് ഈ ചരക്കുനീക്കത്തിന്റെ ഏകോപനം നിർവ്വഹിച്ചത്.
കയറ്റുമതിക്ക് പിന്നാലെ ഇറക്കുമതി പ്രവർത്തനങ്ങളും സജീവമാകുന്നതോടെ ആഗോള സമുദ്രവ്യാപാര ശൃംഖലയിൽ വിഴിഞ്ഞം തുറമുഖം പുതിയൊരു നാഴികക്കല്ല് പിന്നിടുകയാണ്.
