പി. ജയരാജനെതിരെ എസ്‌എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ ഉന്നയിച്ച വിമർശനങ്ങൾക്കു പരോക്ഷ മറുപടിയുമായി സിപിഐഎം സംസ്ഥാന സെക്രട്ടറി എം.വി. ഗോവിന്ദൻ രംഗത്ത്. എസ്‌എൻഡിപി യോഗം ശ്രീനാരായണ ഗുരുവിന്റെ യഥാർത്ഥ ദർശനങ്ങളിൽ നിന്ന് വ്യതിചലിച്ചു സഞ്ചരിക്കുകയാണെന്ന് അദ്ദേഹം കുറ്റപ്പെടുത്തി. സംഘടനയുടെ തെറ്റായ നിലപാടുകൾ ചൂണ്ടിക്കാണിക്കാനും അവ തിരുത്താനും കമ്മ്യൂണിസ്റ്റ് പാർട്ടിക്ക് പൂർണ്ണ അവകാശമുണ്ടെന്നും അദ്ദേഹം വ്യക്തമാക്കി.
വെള്ളാപ്പള്ളിയുടെ പേര് എടുത്തുപറയാതെയായിരുന്നു സിപിഐഎം സംസ്ഥാന സെക്രട്ടറിയുടെ പ്രതികരണം. ശ്രീനാരായണ ഗുരുവിന്റെ ദർശനങ്ങളെ രാഷ്ട്രീയമായി യഥാർത്ഥത്തിൽ പിന്തുടരുന്നത് കമ്മ്യൂണിസ്റ്റ് പ്രസ്ഥാനമാണെന്ന് അദ്ദേഹം ഓർമ്മിപ്പിച്ചു. സനാതന ധർമ്മത്തിന്റെ മുഖംമൂടി അണിഞ്ഞ് സവർണ്ണ മേധാവിത്വം സമൂഹത്തിൽ അടിച്ചേൽപ്പിക്കാൻ ശ്രമം നടക്കുന്നുണ്ടെന്നും എം.വി. ഗോവിന്ദൻ ആരോപിച്ചു.
സംഘപരിവാർ കാഴ്ചപ്പാടുകൾക്ക് തികച്ചും വിരുദ്ധമാണ് യഥാർത്ഥ ഗുരുദേവ ദർശനങ്ങളെന്ന് അദ്ദേഹം ചൂണ്ടിക്കാണിച്ചു. എന്നിട്ടും ആർഎസ്‌എസ് ശ്രീനാരായണ ഗുരുവിന്റെ പേര് ദുരുപയോഗം ചെയ്യുകയാണെന്നും, ഈ ജനവിരുദ്ധ നീക്കങ്ങളെ എതിർത്തു തോൽപ്പിക്കാൻ ശ്രീനാരായണീയർക്ക് ധാർമ്മിക ബാധ്യതയുണ്ടെന്നും അദ്ദേഹം കൂട്ടിച്ചേർത്തു.
