സെക്രട്ടറിയേറ്റിന് മുന്നിൽ നടത്തുന്ന സമരം അവസാനിപ്പിക്കണമെന്ന സർക്കാർ ആവശ്യം തള്ളി എൽപിഎസ്ടി ഉദ്യോഗാർത്ഥികൾ പ്രതിഷേധം കൂടുതൽ ശക്തമാക്കുന്നു. നിരാഹാര സമരത്തിന് പുറമെ ദിനംപ്രതി വൈവിധ്യമാർന്ന പ്രതിഷേധ പരിപാടികൾ സംഘടിപ്പിക്കാനാണ് ഉദ്യോഗാർത്ഥികളുടെ തീരുമാനം. സമരസമിതി നേതാവ് വളർമതി തല മുണ്ഡനം ചെയ്ത് നിരാഹാര സമരം തുടങ്ങിയതോടെ രാപകൽ സമരത്തിലേക്കും ഉദ്യോഗാർത്ഥികൾ കടന്നു.
സർക്കാരുമായി ഇനിയൊരു ചർച്ചയ്ക്കില്ലെന്നും മുൻപ് നൽകിയ ഉറപ്പുകൾ ഉത്തരവുകളാക്കി സമരപ്പന്തലിൽ എത്തിക്കുകയാണ് വേണ്ടതെന്നും വളർമതി വ്യക്തമാക്കി. ക്ലാസുകളിൽ കുട്ടികളുടെ എണ്ണത്തിനനുസരിച്ച് അധ്യാപകരുടെ എണ്ണം കൂട്ടാൻ വിദ്യാർത്ഥി-അധ്യാപക അനുപാതം കുറയ്ക്കണമെന്നും, അനുപാതം കുറച്ചാൽ സാമ്പത്തിക പ്രതിസന്ധിയുണ്ടാകുമെന്നു പറയുന്ന സർക്കാർ 100 ദിന കർമ്മപരിപാടിയിൽ ഉൾപ്പെടുത്തി 10,000 അധ്യാപകർക്ക് എങ്ങനെയാണ് ജോലി നൽകുന്നതെന്നും അവർ ആരാഞ്ഞു.റിപ്പോർട്ടർ ചാനലിന് നൽകിയ പ്രതികരണത്തിലാണ് വളർമതിയുടെ പ്രസ്താവന.
തങ്ങളുടെ ആവശ്യങ്ങൾ ന്യായമാണെന്ന പൂർണ്ണ ബോധ്യമുണ്ടെന്നും ഉദ്യോഗാർത്ഥികളെ തെരുവിൽ നിർത്താനാണ് സർക്കാർ ഭാവമെങ്കിൽ സമരം നിർത്തി പിന്മാറാൻ തങ്ങൾ ഒരുക്കമല്ലെന്നും വളർമതി കൂട്ടിച്ചേർത്തു.
