കോഴിക്കോട്: സിഎംആർഎൽ-എക്സാലോജിക് സാമ്പത്തിക ഇടപാട് കേസിൽ പിണറായി വിജയനെ സംരക്ഷിക്കുന്ന വിധത്തിലുള്ള സർക്കാർ സമീപനം ജനങ്ങളുടെ വിശ്വാസത്തെ വഞ്ചിക്കുന്നതാണെന്ന് ആർഎംപി സംസ്ഥാന സെക്രട്ടറി എൻ. വേണു. കേസ് നിർണായക ഘട്ടത്തിലെത്തിയിട്ടും അതിനൊത്ത കർശന നിലപാട് സ്വീകരിക്കുന്നതിന് പകരം, കേസ് നടപടികൾ കൂടുതൽ സങ്കീർണ്ണമാക്കാനാണ് സർക്കാർ ശ്രമിക്കുന്നതെന്ന് അദ്ദേഹം കുറ്റപ്പെടുത്തി.
പിണറായി വിജയനെതിരെ വിട്ടുവീഴ്ചയില്ലാത്ത നടപടികളാണ് സർക്കാർ സ്വീകരിക്കേണ്ടിയിരുന്നതെന്നും എന്നാൽ അതുണ്ടായില്ലെന്നും അദ്ദേഹം ചൂണ്ടിക്കാട്ടി. ജനങ്ങൾക്ക് മുന്നിൽ സത്യസന്ധത ബോധ്യപ്പെടുത്തുന്നതുവരെ പിണറായിയോട് മാറിനിൽക്കാൻ ആവശ്യപ്പെടാനുള്ള ആർജ്ജവം സിപിഐഎം നേതൃത്വം കാട്ടണമെന്ന് വേണു ആവശ്യപ്പെട്ടു.
ഗുരുതരമായ അഴിമതി ആരോപണം നേരിടുന്ന സാഹചര്യത്തിൽ പ്രതിപക്ഷ നേതൃസ്ഥാനത്തുനിന്ന് പിണറായി വിജയൻ എന്തുകൊണ്ട് ഒഴിഞ്ഞുനിൽക്കുന്നില്ലെന്നും അദ്ദേഹം ചോദിച്ചു. സിപിഐഎമ്മിന്റെ മുൻ മുഖ്യമന്ത്രിമാരിൽ പിണറായിക്കെതിരെ മാത്രമാണ് ഇത്തരം അഴിമതി ആരോപണങ്ങൾ ഉയർന്നതെന്നും, വിഷയത്തിൽ കോൺഗ്രസിനുള്ളിലെ അഭിപ്രായവ്യത്യാസങ്ങൾ തങ്ങളെ ബാധിക്കുന്ന കാര്യമല്ലെന്നും എൻ. വേണു കൂട്ടിച്ചേർത്തു.
