കോഴിക്കോട്: വഖഫ് ബോർഡ് പുനഃസംഘടനയുമായി ബന്ധപ്പെട്ട് മറ്റന്നാൾ നടത്താനിരുന്ന പ്രതിഷേധ മാർച്ച് കേരള മുസ്ലിം ജമാഅത്ത് പിൻവലിച്ചു. വിഷയത്തിൽ സർക്കാർ പരിഹാരം ഉറപ്പുനൽകിയ സാഹചര്യത്തിലാണ് സമരത്തിൽ നിന്നുള്ള പിന്മാറ്റമെന്ന് കേരള മുസ്ലിം ജമാഅത്ത് സെക്രട്ടറി വണ്ടൂർ അബ്ദുറഹ്മാൻ ഫൈസി വ്യക്തമാക്കി.
ബോർഡ് പുനഃസംഘടനയിൽ തങ്ങൾക്ക് പ്രാതിനിധ്യം ലഭിക്കാത്തതിനെതിരെ എ.പി. വിഭാഗം പ്രതിഷേധവുമായി രംഗത്തെത്തിയതോടെയാണ് സർക്കാർ അനുനയ നീക്കങ്ങൾക്ക് തുടക്കമിട്ടത്. തുടർന്ന് വഖഫ് മന്ത്രി എൻ. ഷംസുദ്ദീൻ കാന്തപുരം അബൂബക്കർ മുസ്ലിയാരുമായി നേരിട്ട് കൂടിക്കാഴ്ച നടത്തി പുതിയ ഫോർമുല ചർച്ച ചെയ്യുകയായിരുന്നു.
ചർച്ചയിലൂടെ വിഷയങ്ങൾക്ക് പരിഹാരം കണ്ടെന്നും വഖഫ് ബോർഡിൽ കാന്തപുരം വിഭാഗത്തിന് അർഹമായ പ്രാതിനിധ്യം ഉറപ്പാക്കുമെന്നും കൂടിക്കാഴ്ചയ്ക്ക് ശേഷം മന്ത്രി പ്രതികരിച്ചു. ബോർഡിൽ നേരത്തെ പരിഗണിക്കാതിരുന്നത് ബോധപൂർവ്വമല്ലെന്ന കാര്യം കാന്തപുരത്തെ ബോധ്യപ്പെടുത്തിയതായും മന്ത്രി വ്യക്തമാക്കി.
