തിരുവനന്തപുരം: വാഹനം ഓടിക്കുമ്പോൾ ഒരു നായയോ പൂച്ചയോ കുറുകെ ചാടിയാൽ പോലും ജീവൻ രക്ഷിക്കാൻ ബ്രേക്ക് ചവിട്ടുന്നവരാണ് സാധാരണ മനുഷ്യരെന്നും, എന്നാൽ കനിവും ദയയുമില്ലാത്ത ഒരു സമൂഹമായി നാം മാറിക്കൊണ്ടിരിക്കുകയാണെന്നും മുൻ ഗതാഗതമന്ത്രി കെ.ബി. ഗണേഷ് കുമാർ. കേരള ഫിഗർ ആർട്ടിസ്റ്റ് കളക്ടീവിന്റെ സംസ്ഥാന സമ്മേളനം ഉദ്ഘാടനം ചെയ്ത് സംസാരിക്കവെ നെടുമ്പാശ്ശേരി മിനി കൂപ്പർ അപകടത്തെ പരാമർശിച്ചാണ് അദ്ദേഹം ഇക്കാര്യം ചൂണ്ടിക്കാട്ടിയത്.
മനസ്സാക്ഷിയില്ലാത്തവരും മൃഗീയ മനസ്സുള്ളവരും വാഹനം ഓടിക്കുമ്പോൾ മരണങ്ങൾ ഒരു പ്രശ്നമല്ലാതായി മാറുന്നുവെന്ന് അദ്ദേഹം പറഞ്ഞു. മൂന്ന് യുവാക്കളുടെ ജീവന് ഒരു ചെറുപ്പക്കാരൻ വിലകൽപ്പിക്കാത്ത ദാരുണ സാഹചര്യമാണുണ്ടായത്; മുൻപൊക്കെ അപകടമുണ്ടാക്കിയവർക്ക് മൃതദേഹം വീട്ടിലെത്തും മുൻപേ ജാമ്യം ലഭിക്കുമായിരുന്നെങ്കിൽ, പ്രതിയിൽ നിഷ്കളങ്കത ഇല്ലാത്തതിനാലാണ് ഇത്തവണ കോടതിയിൽ നിന്നുപോലും ദയ ലഭിക്കാതെ ജാമ്യം നിഷേധിക്കപ്പെട്ടതെന്നും അദ്ദേഹം വ്യക്തമാക്കി.
ഇത്തരം ദുരന്തങ്ങൾ കുടുംബങ്ങളിലുണ്ടാക്കുന്ന ആഘാതം വളരെ വലുതായതുകൊണ്ടാണ് ഡ്രൈവിംഗിന് പോലീസ് വെരിഫിക്കേഷൻ സർട്ടിഫിക്കറ്റ് നിർബന്ധമാക്കണമെന്ന നിലപാട് താൻ സ്വീകരിച്ചിരുന്നതെന്നും അദ്ദേഹം ഓർമ്മിപ്പിച്ചു. മക്കളെ പണക്കാരോ പ്രമാണിമാരോ ആക്കുന്നതിന് പകരം, അവരിലെ കലാ-കായിക വാസനകളെ പ്രോത്സാഹിപ്പിച്ച് ദയവുള്ള നല്ല മനുഷ്യരായി വളർത്താൻ മാതാപിതാക്കൾ ശ്രദ്ധിക്കണമെന്നും അദ്ദേഹം കൂട്ടിച്ചേർത്തു.
